Un home resultou ferido por arma de fogo na localidade coruñesa de Oleiros tras tratar de agredir un axente da Garda Civil cando ía ser detido como presunto autor dun delito de violencia de xénero. Segundo informan fontes da Garda Civil, os feitos ocorreron na tarde deste pasado xoves, sobre as 20.00 horas, cando persoal da Comandancia da Coruña entrou nunha vivenda co obxectivo de deter o varón.

Esta persoa tería incumprido unha medida cautelar ditada pola Sección do Penal do Tribunal de Instancia da Coruña, Praza Seis, así como un segundo delito de violencia de xénero. Ante a chegada da patrulla, o agora detido comezou a lanzar artefactos pirotécnicos, un dos cales provocou o incendio dun coche oficial ao entrar por unha das súas fiestras. Ante a situación de risco creada, acudiron reforzos.

A pesar de todo, a conversación co axente negociador fracasou, polo que se procedeu a entrar na vivenda. Nese momento, lanzou un segundo artefacto incendiario contra os axentes intervinientes e lanzouse contra eles cunha arma branca. “Ante o risco para a súa vida, un dos gardas civís fixo uso da súa arma regulamentaria”, engaden desde a Benemérita.

Deste xeito, o detido resultou ferido por arma de fogo, sendo atendido no lugar e trasladado posteriormente ao hospital, onde permanece ingresado e estable, segundo as mesmas fontes consultadas por Europa Press.