A Xunta e Afundación presentaron o catálogo da exposición ‘A Coruña no tempo’, unha mostra que recibiu case 8.000 visitas e pechará as súas portas o próximo 16 de setembro na cidade herculina. “Non é un catálogo convencional, o visual predomina sobre o textual”, destacou o director xeral de Cultura, Anxo Lorenzo, na presentación na sede de Afundación.

Na mesma estivo acompañado pola coordinadora adxunta da Área de Cultura de Afundación, Paloma Vela; a directora xerente da Fundación Cidade da Cultura, Ana Isabel Vázquez; e polo comisario da mostra Manuel Gago.

Esta exposición é a cuarta das sete mostras que conforman o proxecto ‘Cidades no tempo’ que, segundo explicou Lorenzo, naceu “como unha revisión de como as cidades galegas conforman a Galicia contemporánea“. Despois de Santiago, Ferrol, Lugo e A Coruña continuará o seu percorrido en outubro coa inauguración dunha nova mostra en Vigo.

Neste sentido, Gago recalcou que estes eventos deben “deixar un legado, unha proposta para o futuro que se incorpore á propia identidade da cidade”. Por este motivo, engadiu, este catálogo “está pensado para o público en xeral e reproduce a estrutura da mostra”.

CONTIDO

Segundo explicou, o libro “tenta trasladar de forma impresa a experiencia de sala” e inclúe as pezas físicas e “tamén os elementos interactivos e multimedia”. “Utilizamos o pasado para buscar as claves da identidade das cidades que no caso da Coruña é moi poliédrica e moi ampla”, engadiu.

Na mesma liña, Vela recalcou do catálogo que “recolle de maneira fonda, reflexiva e contextualizada a importancia da cidade da Coruña na entidade galega” e faino a través de “reflexións de importantes eruditos do tema”.

Este relato sobre a “identidade e historia” da cidade herculina contrúese con máis de 90 pezas de distinta tipoloxía como documentos históricos, obxectos simbólicos, obras de arte, fotografías ou planos, ademais da análise de expertos.