Stradivarius renovou o seu establecemento en Marineda City co seu novo concepto de tenda, deseñado para que moda e experiencia converxan, segundo informan o centro comercial. Con máis de 800 metros cadrados e situada na primeira planta do centro comercial propiedade de Merlin Properties, a cadea de moda moza de muller do Grupo Inditex ofrece as últimas tendencias en moda, bolsos, zapatos, perfumes e complementos.
A nova tenda responde a unha estética minimalista na que predomina unha paleta de brancos, grises e beiges, que aposta polos materiais naturais e busca que as coleccións tomen todo o protagonismo. O establecemento reabriu de novo as súas portas o venres, 1 de setembro, tras as obras de reforma. A finais de marzo foi Pull&Bear quen reabriu cun establecemento totalmente renovado. Outras marcas do Grupo Inditex como Zara, Oysho, Lefties, Bershka, Massimo Dutti e Zara Home tamén contan con presenza en Marineda City.
