Celebrouse esta mañá de xoves o pleno de novembro na cidade da Coruña. Un pleno que tiña como punto forte, o que o goberno califica como “Modificación das ordenanzas fiscais municipais”, mentres o PP chama a “subida dos impostos”.

O pleno aprobou, cos votos do PSOE, o comezo do proceso de actualización de ata 29 ordenanzas fiscais municipais de cara ao exercicio 2024. Unha votación que contou coa abstención do BNG (que condicionou o seu voto final á negociación dos orzamentos), e os votos en contra do PP.

Un PP que manifestaba a súa “indignación polo aumento de impostos sen ningunha explicación aos coruñeses nin ao principal partido da oposición, cando afecta á práctica totalidade impostos”, denunciando que “os coruñeses pagaremos un 18% máis de IBI do que deberíamos en 2024”. Aproveitou Lorenzo para criticar a baixa porcetanxe de execución dos investimentos que leva o goberno: “É lamentable que un goberno municipal suba impostos que non executa o orzamento. No anterior mandato deixaron 180M€ para
traballa nos barrios sen gastar e este ano teñen outros 60M€ máis”

As táboas

Sinala o Concello a algunhas das taxas non eran moficadas dende 2013, e lembra a subida acumulada do 21,6% do IPC, “o que leva aparellado un maior custo dos servizos”, intenta explicarse o consistorio.

O IBI (Imposto de Bens Inmoble) ten unha subida do 3% (xa subira en 2019), quedando no 0,618, tanto en rústica como en urbana.
Si que recolle a modificación un recargo ás vivendas desocupadas, que será dun 50% para os inmobles que permanezan desocupados nun prazo superior a dous anos e pertenzan a titulares con catro ou mais inmobles de uso residencial.

Outras taxas como o imposto de circulación subirá tamén un 3%.

Outras mocións

O Pleno si aprobaba por unanimidade a creación da sociedade pública que xestionará a Cidade das TIC. Tamén se aprobou, sen votos en contra, o modificativo de crédito que permitía a achega municipal de 336.000 euros ao órgano xestor compartido coa UDC, o 51% do capital correspondente.

Tamén por unanimidade quedou aprobado o estudo de detalle para a ampliación de dez novos volumes edificatorios na parcela da empresa Showa Denko no polígono de Agrela.

Mocións do BNG

O Pleno aprobou tres mocións formuladas polo BNG, dúas delas -a do cumprimento de obrigas en materia de transparencia e hixiene democrática e a da necesaria reapertura do Xardín do Observatorio- por unanimidade. O BNG, a través do edil David Soto. pedía a publicación das Declaracións de Bens da corporación despois de 5 meses sen facelo.

Sobre o Xardín do Observatorio, como avanzaron ao longo da semana, instou ao goberno a face caso canto antes á “incansable loita da asociación veciñal da Agra na reivindicación de zonas verdes”. O parque, pechado dende 2020, leva 8 meses sen unha soa acción malia o acordo plenario acadado en marzo, e “as tarefas pendentes son ben coñecidas: derrubar os muros da Canceliña e Gregorio Fernández, acondicionar o espazo e construír un valo interior para delimitar o espazo da delegación da AEMET e a zona verde”.

A iniciativa sobre o 25N -Día Internacional da Eliminación da Violencia contra as Mulleres- foi aprobada cos votos favorábeis do grupo municipal socialista, mais contou coa abstención do PP. Esta suscitou un debate entre BNG e PP. Os populares intentaron engadir unha emenda pero o BNG non aceptou “porque sería tanto como dar por boa a política que en materia de loita contra a violencia machista está a desenvolver a dereita desde as institucións de goberno”. “Lembremos que a Xunta eliminou do currículo educativo a materia de Igualdade de Xénero. Non é así como se aposta por unha educación en igualdade das nosas crianzas e da nosa xente moza”, denunciou Veira.

OBRAS

E ademais aprobouse un modificativo de crédito por valor de 3,5 millóns de euros para diversos investimentos, entre os que se recolle a consignación de crédito do capital necesario para a creación de dita sociedade.
Outro dos investimentos, de 773.095 euros, será para o financiamento das obras da estación Intermodal, que inclúen a execución da terminal de autobuses, aparcadoiros, xunto con elementos comúns da intermodalidade. O voceiro do Goberno municipal, José Manuel Lage, anunciou que a alcaldesa xa asinou o convenio co MITMA para a transferencia de 9 millóns de euros para o financiamento da estación Intermodal.