A Fundación María José Jove e o Complexo Hospitalario Universitario da Coruña (Chuac) organizan este mércores a ‘I Xornada Medicina e Humanismo: Arte e Emocións‘. Trátase dunha iniciativa dirixida a estudantes de último curso do grao de Medicina da Universidade de Santiago de Compostela (USC) que combinará relatorios de carácter médico humanista con dinámicas de obras de arte situadas na sala de exposicións da Fundación.

“Trátase dunha iniciativa nova en Galicia na que a arte se converterá nunha ferramenta de contacto con sensacións, ideas e sentimentos, trazando un paralelismo co exercicio da empatía, tan esencial na conexión da relación médico-paciente”, explica a institución. A través desta xornada, os organizadores proporán “unha aproximación a diversas expresións artísticas co obxectivo de reflexionar sobre a importancia e axuda que pode proporcionar o desenvolvemento de certa sensibilidade artística na práctica clínica, ao propor ideas que teñen que ver con valores como a xustiza, a empatía, a beneficencia ou a compaixón”.