Despois de 3 anos de movemento cidadán, de 33.000 sinaturas presentadas, da Proposición Non de Lei #IniciativaXabarón coordinada dende AMesa pola Normalización Lingüística e a conta @tvg_infantil_xa, o Xabarín poderá volver ser protagonistas das tardes das nosas crianzas.
A CRTVG vén de presentar a plataforma AGalega (a maior plataforma de contidos audiovisuais en galego xa está dispoñible nas web agalega.gal e como APP en Google Play e App Store.
A entidade actualiza así a súa presenza na rede, que unicamente consistía nunha APP (Xabarín), pechada e obsoleta, e a coñecida Radio Picariña. ‘AGalega’ nace con máis de 1.400 contidos en aberto e gratuítos, coa mellor ficción, cine, series, animación, podcasts, producións infantís e xuvenís, e irá medrando día a día.
Contidos exclusivos e series míticas
Os contidos tanto da plataforma como das apps irán mudando e medrando.
‘AGalega’ parte xa con contidos exclusivos que só se poderán ver na plataforma. Series como ‘Na Gloria’, interpretada por Xosé Touriñán e Dani Rovira, ou ‘Ghuasapp’ verán a luz exclusivamente na contorna dixital.
Ademais a plataforma contén as series míticas da TVG combinadas coas máis modernas. ‘Padre Casares’, ‘Pratos combinados’ ou ‘Mareas vivas’ comparten escena coas novas creacións que tamén marcaron época: ‘Saudade de ti’, ‘Auga Seca’, ‘A Estiba’, ‘Operación Marea Negra’, ‘O sabor das margaridas’, ‘O faro’, entre moitas outras.
