- Xornada 21 – Celta Fortuna 1 – Depor 2
- Golpe anímico á competición dun Depor que vai a máis.
- Vixésimo primeiro partido de Imanol Idiakez como adestrador do Depor en partido oficial (9V 8E 4D).
—- —- —
Poderíase facer un símil do que está a dar o Dépor esta tempada coa vida dun escalador que ten por diante un reto maiúsculo coma subir ao Everest. Vitoria onte moi importante para a moral do equipo e, sobre todo, para a afección que tivo que aguantar carros e carretas por xogar co filial do veciño, cousa dura de por si. Día grande onte en Vigo xa que viña o Dépor e había que sacar tods os complexos a relucir: cambio de horario, partido do Celta pola mañá e espectáculos e festa todo o día ata o evento deportivo máis importante do ano en Vigo. Non o digo eu, o feito de modificar rutinas amosa as gañas de amolar dende o club veciño.
Con todo e con iso, vimos un Dépor ordeado, serio, pero ramplón na primeira metade. Nun campo no que non se podía controlar un balón ou tocar á primeira, o Dépor foi quen de facer o fútbol que leva todo o ano querendo facer: saír con velocidade correndo en campo contrario. A mellor noticia de todas é que Mella e Yeremay aportan o descaro que tanto botamos de menos na primeira volta. Quizais, estas sexan as fichaxes que tanto anhelamos, xunto con Barbero e a mellor versión de Lucas que estamos a ver, este pode ser o mellor revulsivo para a segunda parte da tempada.
Dende a derrota en Irún, para min o punto de inflexión na tempada, o ascenso afastábase a sete puntos e ocupábase a posición nº 12 da táboa, con catro por riba do descenso, preto do descenso a 2RFEF. Ademais, non aparecían as fichaxes de verán e os resultados da casa eran unha lousa difícil de levantar. Neste tempo con dúas serias ameazas de destitución do míster, o Dépor xogou 10 partidos conseguindo 6 vitorias, 3 empates e unha única derrota en León hai dúas semanas. 21 puntos de 30 posibles colocan o equipo a só 5 puntos da cabeza.
O particular Everest do Depor comezaba en xaneiro, xa que tiña por diante catro partidos con rivais que ocupaban catro das cinco primeiras posicións. O resultado é mais que esperanzador, pois puido derrotar a tres deles (Real Sociedad B, Ponferradina e Celta Fortuna) e segue recortando diferencias coa cabeza da competición. Non só é cousa de puntos, tamén é cousa de actitude. Trocaron as cabezas dos xogadores e trocou a forma de xogar, a confianza é maior e o míster sae reforzado deste comezo de ano, só resta chegar o alcume cunha segunda volta de récord. Niso estamos.
- Miguel Barreiro Bugallo. Coruñés e deportivista no exilio mesetario. Sufrindo ó depor dende 1988. O que sei de fútbol, o Depor empéñase en negarmo. Firme defensor do fútbol de botas negras.
MÁIS CRÓNICAS DO DÉPOR
- X.19: Balance dunha primeira volta decepcionante.
- X.17: Un Dépor cómodo no barro.
- X.16: Dilema branquiazul.
- X.15: Idiákez salva o pescozo.
- X.14: Un Dépor baleiro.
- X.13: O Dépor e a marmota.
- X.12: As mil caras do Dépor
- X.11: Tímida recuperación do Depor.
- X.10: As árbores e o bosque do Dépor
- Miguel Barreiro: Punto de non retorno.
- Miguel Barreiro: A canonización de Idiákez.
- Miguel Barreiro: Pobre arranque dun Dépor errático
- Miguel Barreiro: O Dépor faino todo.
- Miguel Barreiro: As novas posibilidades do Dépor.
