Cando as administracións queren, poden.
Difícil de entender que en apenas unha semana, e despois de tantos anos e meses de parálise total, de botarse a culpa entre administracións, a Xunta poida encarrilar a a incoación para declarar Ben de Interese Cultural (BIC), na categoría de monumento, os murais de Urbano Lugrís da rúa Olmos da Coruña.
Así o avanzou hoxe a Xunta, que publicará o comezo do expediente este mesmo martes no Diario Oficial de Galicia, despois, segundo sinalan, de recibir os informes realizados polo Concello da Coruña.
Segundo destacou a Xunta, á hora de incoar o expediente –que supón xa a protección inmediata do ben– os técnicos da Dirección Xeral de Patrimonio Cultural valoraron que as 12 obras que compoñen o conxunto mural merecen formar parte do patrimonio cultural máis significativo de Galicia pola súa calidade e contexto artístico e para garantir a súa conservación e proxección cara ás futuras xeracións.
Así mesmo, o expediente destaca tamén a calidade artística destas obras. Neste sentido, expuxo a Consellería, “ponse en valor que se trata dunha obra de arte complexa que ten un carácter excepcional dentro de toda a produción artística de Urbano Lugrís ao non conservarse ningún conxunto desta natureza que sexa testemuña do nivel que chegou a adquirir no ámbito da composición e da creatividade na decoración de interiores”.
Doutra banda, tense en conta que este conxunto “se constitúe como a testemuña máis evidente das experiencias persoais e culturais que marcaron a definición dun estilo propio e único”, xa que “reflicten os diferentes mundos do universo lugrisiano anteriores a outras influencias aprendidas: o teatro de monicreques, os seus anos de inmersión nas coleccións e biblioteca Massó ou a atracción polo fondo mariño e as panorámicas costeiras galegas”.
UNHA DUCIA DE PEZAS
En concreto, o conxunto mural da rúa Olmos está composto por pezas que formaban parte do antigo local de hostalaría que ocupabba os pisos baixo e primeiro de ambos os inmobles.
O pintor deseñou estas pinturas para o Restaurante Fornos, un popular local que forma parte da identidade coruñesa e da súa memoria social que xa existía no século XIX.
Trátase dun total de 12 pezas que presentan diferentes estados de conservación e nas que se representan estampas como a mariña coruñesa, fondos mariños con peixes, algas, serenas ou medusas; motivos mariñeiros como barcos, veleiros, áncoras ou galeóns ou panóramicas da cidade, entre outros temas.
Así, entre os elementos que aparecen representados destacan a Torre de Hércules, a antiga Comandancia da Mariña da Coruña ou o Castelo de San Antón.
A Xunta detallou que a incoación do expediente para a declaración como Ben de Interese Cultural xa foi comunicada ao Xulgado Mercantil número 3 da Coruña, encargado do proceso concursal.
Agora, explicou que, tras a súa publicación no DOG, a administración autonómica disporá dun prazo máximo de 24 meses para completar o expediente.
Máis novas sobre o caso Murais
Tarde, pero Xunta e Concello impulsan a declaración BIC dos murais de Lugrís
