A alcaldesa da Coruña, Inés Rey, acusou á Xunta de “torpedear” a petición do goberno local para declarar a cidade mercado tensionado e fixar un tope ao prezo do aluguer en determinadas zonas, de acordo coa lei estatal de vivenda.
Fronte a iso, a vicepresidenta segunda e conselleira de Medio Ambiente, Territorio e Vivenda, Ángeles Vázquez, instou ao consistorio a sacar chan público seguindo o modelo autonómico e insistiu en que á Administración galega correspóndelle facer cumprir a lei estatal.
“A Xunta di que ningunha cidade galega cumpre cos requisitos, non ten ningúna lóxica que primeiro esixan documentación para apoiar a solicitude e logo digan que non cumprimos”, aseverou a rexedora, en rolda de prensa, tras a Xunta de Goberno.
E é que para a socialista Inés Rey o que busca o Goberno galego é “torpedear” en lugar de dar “unha solución real” a un problema de vivenda. “Non comprendemos esa actitude”, asegurou mentres dixo, para xustificar a necesidade de declaración de mercado tensionado, que na Coruña en oito anos o prezo medio do aluguer “subiu un 56,6%”. “A Xunta fixo 40 vivendas en doce anos”, apostilou tamén.
Pola súa banda, a conselleira manifestou que a alcaldesa é “libre de declarar as zonas tensionadas, o que único que ten que facer a Xunta é que cumpra co mandato da lei estatal”.”Se ten dúbidas nós clarificámosllas”, aseverou nun acto sobre vivenda, en relación ás proxectadas no Ofimático, no Palacio de Congresos e Exposicións da Coruña.
Mentres, instou ao consistorio a facer “unha planificación a 20 anos” e con “un 20 por cento de vivendas públicas”, asegurou para incidir nas actuacións da Xunta nesta materia sacando a concurso adoito.
