Esta mañá a Delegación do Goberno na Coruña celebraba un acto simbólico no Paseo Marítimo de O Burgo, en Culleredo. Aproveitando que mañá xoves, 21 de marzo, se celebran tanto o ‘Día Internacional dos Bosques’ como o ‘Día Mundial da Síndrome de Down’, as institucións contaron con nenos e nenas da Asociación Down Coruña para comezar a varios exemplares de árbores autóctonas que convertirán o espazo nunha zona verde. O proxecto contempla a plantación de 190 exemplares de piñeiro, bidueiro, sabugueiro, freixo, loureiro, espiño branco e maciñeira silvestre.

Durante o acto o Delegado do Goberno, Pedro Blanco, avancou que as obras de dragaxe e rexeneración da Ría do Burgo están a piques de rematar.
A actuación comezou a principios de 2022 e durante este tempo retiráronse do fondo da ría 583.000m3 de material contaminado nun procedemento cualificado como “cirúrxico” pola súa minuciosidade. Ao tempo, preserváronse 227.000m2 de hábitats e creáronse 70.000 m2 de zonas verdes que permiten dar continuidade ao paseo ao redor da ría.

Tamén se restituíron os canais da ría, os bancos marisqueiros e o fondo da lagoa de Culleredo e unha parte do material destinouse a recuperar a Praia de Santa Cristina. Así mesmo, o proxecto inclúe un minucioso control ambiental durante 10 anos que se estende antes, durante e despois das obras.

Lembrou que o goberno estatal investiu 37,5 millons de euros neste necesario proxecto, convertíndose na “actuación de rexeneración ambiental dun sistema costeiro máis ambiciosa da historia de España”.
Entre as partidas, destacan os 3,7 millóns destinados a compensar aos mariscadores da Ría que tiveron que paralizar a súa actividade neste tempo “a través dun novidoso procedemento”.