Despois de varios anos de investigación, o Club de Leones quere rescatar o coñecido como Vello Camiño de Santiago. Un novo itinerario xacobeo que percorre a provincia da Coruña seguindo a cartografía antiga, da que se conservan documentos históricos de máis de 200 anos de antigüidade que certifican a súa existencia.
O vicepresidente da Deputación e responsable da área de turismo, Xosé Regueira, escoitou as propostas da directiva do Clube de Leóns da Coruña Torre de Hércules, da man de Manuel Rodríguez, vicepresidente e tesoureiro, e Carmen Payá e Belén Montes, historiadoras encargadas do deseño do estudo para establecer os trazados.
A primeira proposta é crear a Asociación Amigos do Vello Camiño de Santiago, da que poderían formar parte os concellos de Arteixo, A Laracha, Carballo, Cerceda, Cambre, Carral, Tordoia, Trazo, Malpica, Abegondo, Ponteceso, Cabana, Betanzos, Santiago e A Coruña.
O Vello Camiño conta co recoñecemento da Igrexa, pero aínda non co da Xunta de Galicia, de aí que Regueira invitara aos Leóns a xuntarse co administración galega para apurar o recoñecemento e poder optar a subvencións.
Itinerarios
O Vello Camiño ten dúas variantes. Unha parte de Betanzos e a outra, da igrexa de Santiago, na Coruña, aínda que as dúas conflúen en Rodís (Cerceda) para entrar na capital galega polo barrio de Vista Alegre. Cada itinerario percorre uns 100 quilómetros, na súa maior parte por camiños de terra e entre aldeas, formando unhas 4 ou 5 etapas.
