Mentres o Concello esquece a actualización do concesión de transporte urbano (despois dun ano no candeleiro o goberno optou por unha irresponsable prórroga da concesión por dous anos, 2025 e 2026, sen que se fixase ningún prazo para unha nova licitación), segue pendente tamén outra medida que favoreza o uso transporte colectivo e unha mobilidade máis sustentable na cidade: o carril bus, ou carril VAO, carril para Vehículos de Alta Ocupación.
Parece que a recuperación do carril bus de Juan Flórez, e a implatación do carril VAO nas proxectadas reformas da Ponte Pasaxe e da Avenida da Vedra non son unha prioridade para o goberno socialista como denuncia hoxe o BNG, tralas respostas ofrecidas polo goberno local a unhas preguntas da concelleira Avia Veira.
O goberno argumenta que a implantación de devanditos carrís fican condicionados ao novo contrato que vén de evitar actualizar.
Novo contrato
“Deixaron caducar a concesión dos buses sen licitar aínda o novo contrato, é por iso que non actúan ante o estado en que se atopa a frota, con vehículos moi desgastados e pendentes de renovación, sen suficientes frecuencias e con xente agardando nas paradas sen poder subir a buses totalmente ateigados”, remarca.
Fondos europeos
Veira critica tamén o “mal uso dos recursos públicos” por parte do Goberno Local. Refírese en concreto a que o Concello consignou nos orzamentos 540.353 euros, procedentes de fondos Next Generation, para financiar a implantación do carril bus en Juan Flórez.
O Goberno Local afirma que o medio millón de euros se destinará “a outros proxectos”, mais non os especifica, razón que leva o BNG a temer pola súa perda. “É moi difícil de xustificar que non se executase esa actuación, que estaba nos orzamentos”, recalca.
Máis novas
O BNG pregunta pola reimplantación do carril bus por Juan Florez
