Contabamos onte o aumento do uso do bus urbano nos últimos anos. Un aumento que non vén acompañado dun aumento da flota e da frecuencia do servizo de transporte público, como sinala a Asociación de Veciños Castrillón-Urbanización Soto “IAR” despois de manter unha reunión coa dirección e os técnicos da Compañía de Tranvías.
A reunión tiña como obxectivo de analizar o estado do transporte público no barrio (liñas 1, 12A e 14) así como posibles alternativas para a súa mellora, pero as consecuencias son ben interesantes neste momento no que o Concello vén de prorrogar a concesión á Compañía por dous anos no canto de reformulala, o que dificulta a amortización do investimento necesario.
A entidade veciñal cre que “na actualidade, as posibles melloras de todo o transporte público da cidade deberían implicar un importante incremento da flota de autobuses dado o importante crecemento do número de usuarios nos últimos anos”.
Vai máis alá, e sinala que “o deterioro do funcionamento dalgunhas das liñas ten a súa orixe en que, dende hai anos, o modelo e as liñas das mesmas non se modifican, en toda a cidade, en particular en non ter apostado decididamente, como vimos reclamando dende hai anos, por un modelo baseado en transbordos e liñas curtas con boa frecuencia”.
Por iso, a Asociación insta “ao goberno municipal e á empresa de tranvías a iniciar un proceso de diálogo para buscar as fórmulas que se consideren necesarias para facer posible o investimento necesario”.
Máis novas
