Xa o ano pasado puidemos ver artistas do país como Catuxa Salom, Eris Mackenzie, Lontreira ou O Rabelo sobre o escenario do Atlantic Pride. De feito, a edición de 2023 foi unha das primeiras citas que vibraron coa revolución das Fillas de Cassandra.
Neste 2025, a música galega contemporánea volverá ter un protagonismo especial na 6ª edición do Festival do ‘Orgullo do Norte’, que se celebrará na Coruña do 6 ao 13 de xullo de 2025.
Tralas primeiras confirmacións, o festival avanza as novas artistas que formarán parte do cartel: De Ninghures, Coolnenas, Agoraphobia, Alana, LERIA, ELBA e Rivadulla.
O domingo 6 de xullo, as bandas encargadas de dar o pistoletazo de saída á nova edición do Atlantic Pride na Praza de Pontevedra serán De Ninghures e Coolnenas. De Ninghures, que xa triunfaron no Festival dos Medios en Galego, é unha das formacións referentes da potente e rica escena actual en Galicia. A banda nada arredor da Foliada da Fonsagrada pero con xentes de Compostela ou Bergantiños, presentará ao vivo os temas do seu novo álbum, Feira, que viu a luz o pasado mes de febreiro.
Mentres, as Cool Nenas presentará a súa particular rave de debuxos animados que está a revolucionar o concepto de dj set alí por onde pasan.
O luns 7 de xullo, a cantante e produtora santiaguesa ELBA fará a súa aparición no Atlantic Pride a golpe de sintetizadores, voces atmosféricas e elementos operísticos que dan vida á súa electrónica pop de vangarda.
Xa o martes 8 de xullo, chegaralle a súa quenda a Agoraphobia e máis a Rivadulla. A banda de rock alternativo nada en Boiro regresou o pasado mes ás ondas con Eyes Never Lie, o primeiro avance do seu novo álbum, que o público do Atlantic Pride poderá escoitar ao vivo no escenario da Praza de Pontevedra.
Pola súa parte, Rivadulla, canteira de Monte Alto, traerá o seu pop dos 2000, mesturado coa música electrónica con toques indies e o trap, nun concepto que o propio artista define como “parkineo marika”.
Pola súa banda, o mércores 9 de xullo, Alana (formado por Antía Vázquez (Oleiros), Pablo Castro (Vimianzo) e Eloy Vidal (Ponteceso)) amosará a súa música tradicional galega con ritmos de base electrónica e pop, nun proxecto novo, diverso e cunha potente posta en escena, vinculada coas raíces e o baile.
Finalmente, esa mesma noite, as herculinas LERIA, despois do seu éxito no Aquí tamén se fala e no Festival dos Medios en Galego deste ano, fará gala sobre o escenario do Atlantic Pride da súa celebrada música indie na nosa lingua, cun directo sólido, enérxico, intenso e divertido a partes iguais, onde o público pode tanto desfrutar dos seus temas máis íntimos como festexar con aqueles máis bailables.
A cita, que na súa pasada edición reuniu a máis de 25.000 persoas, está impulsada pola Asociación Orgullo Coruña -ORCO- e o Concello da Coruña e conta co apoio da Deputación da Coruña e o patrocinio principal de Estrella Galicia, Coruña The Style Outlets e Globalgrafic.
Máis novas do Atlantic
Edurne, Nia e Merche entre os primeiros nomes confirmados do Atlantic Pride 2025
O Atlantic Pride pasa das raíces de Catuxa Salón aos Xardíns de Méndez Núñez
As Fillas de Cassandra ou o destape da música tradicional galega
