Este pasado xoves o presidente da Deputación, Valentín González Formoso, visitaba o Concello de Cambre para avaliar o estado das obras das beirarrúas da Patiña. A rexedora, María Pan Lesta, traía unha serie de peticións para trasladarlle ao presidente provincial, pero decidía abandonar a comitiva denunciando a “falta de respecto institucional e o insulto á corporación”.
Fíxoo porque considerou que a visita era máis “unha xuntanza de partido que unha visita institucional para comprobar o avance das obras promovidas polo goberno Unión x Cambre e a Asociación de Veciños de Cela”. A visita xa viña marcada pola negativa, segundo sinala o grupo de goberno, por parte da Deputación, a que participasen “os concelleiros do goberno, que aínda son descoñecidos” polo ente provincial. “Cando chegamos ao recinto, sorprendeunos atoparnos con tres dos catro edís do PSOE de Cambre e a representantes do partido a nivel provincial, algo que consideramos un agravio respecto do resto de grupos da corporación no que nós, desde logo, non imos participar”.
Criticaan así que quen dirixe a Deputación, “un alcalde, coma min, converta isto nun acto de partido, algo que, na miña opinión, é unha falta de respecto ao Concello de Cambre”.
Antes de marchar, Pan Lesta trasladoulle un documento coas 4 solicitudes que leva presentado o Concello á Deputación dende o 29 de abril de 2024 ata o 24 de xaneiro, e “que aínda non tiveron resposta”.
O Concello volveu pedir a construción dunha rotonda na intersección cara a Brexo-Lema e Pravio, medida que xa fora proposta nos anos 2020 e 2022 e foi concibida como un convenio de colaboración entre o Concello, Deputación e Xunta, pois coinciden estradas das 3 administracións.
Outra das demandas é a execución de pasos de peóns na DP-1702 e, concretamente, na zona dos IES David Buján e Castrobo.
