Monte Alto acolleu esta tarde un novo, o cuarto de 11, encontro participativo sobre o futuro do autobús urbano da Coruña.
Arredor dunha teintena de persoas participaron no encontro no que a alcaldesa Inés Rey estivo acompañada dos concelleiros José Manuel Lage, Noemí Díaz e Yoya Neira. Parte do equipo técnico do estudo do transporte urbano presentou o informe básico realizando unha dinámica participativa na que as persoas asistentes puideron achegar propostas sobre frecuencias, liñas, accesibilidade, conexións intermodais ou cobertura territorial.
O distrito conta con aproximadamente 30.762 habitantes articúlase en 10 liñas de autobús urbano (3, 3A, 4, 5, 6, 6A, 7, 11, 17) máis o BUH e cun total de 38 paradas.
Prezos ok; frecuencia mal
Como nos anteriores encontros, os prezos foron o elemento mellor valorado, cunha media de 8,6 puntos. Con todo, respecto ao resto de encontros, case todas os aspectos foron puntuados por enriba de 5: marquesiñas (6,3), accesibilidade (6,1), liñas e paradas (6.1) e a frecuencia dos servizos (5.5).
A intermodalidade foi o aspecto peor valorado (3,9), así como o único que non acadou a metade da escala.
Neste sentido, a cidadanía identificou como ámbitos prioritarios de mellora a intermodalidade con outros medios de transporte (28%), a frecuencia e tempo de espera dos autobuses, seleccionada por un 24% das persoas participantes seguida da adaptación a eventos masivos (11%).
Próximos encontros
O vindeiro martes, 6 de maio ás 18.30 horas, terá lugar o seguinte dos encontros. O quinto dos 11 programados polo Concello ate o mes de xuño, co obxectivo de recoller unha ampla representación das voces da Coruña. O calendario previsto é este:
- 6 de maio: Centro Cívico de Monelos
- 20 de maio: Centro Cívico do Birloque
- 29 de maio: Centro Cívico dos Rosales
- 5 de xuño: Fórum Metropolitano
- 10 de xuño: Centro Cívico de Eirís
- 12 de xuño: Centro Cívico de Elviña
- 14 de xuño: Circo de Artesáns
As persoas interesadas en participar nalgún ou nalgúns dos once Encontros de Barrio programados ata mediados de xuño xa poden formalizar a súa inscrición a través desta ligazón. Ademais, toda a información sobre o proceso participativo estará dispoñible nesta web específica.
Máis novas
A veciñanza do Castrillón pide un “modelo baseado en transbordos e liñas curtas con boa frecuencia”
Gran interese no primeiro encontro participativo para deseñar a nova rede de bus urbano en Mesoiro
