A Consellería do Mar, a través de Portos de Galicia, autorizou ao Concello de Laxe para utilizar as instalacións portuarias da localidade para realizar obras de mellora nas redes de saneamento e pluviais na rúa Real e na das Rías. Segundo explicou a Xunta nunha nota de prensa, a actuación prevista consiste na renovación da rede de saneamento existente, así como a separación da rede de pluviais.

En concreto, indicou que se instarán novos tubos conectándoos nun pozo “e instalando como medida adicional un caudalímetro controlado telematicamente”. Doutra banda, “instalarase a rede de pluviais de forma separada á de saneamento”.

Noutra orde de cousas, a Consellería do Mar, a través de Portos de Galicia, tamén autorizou a instalación dun colector de lixo mariño no porto de Tragove, no municipio pontevedrés de Cambados. Neste caso, o titular da autorización será a Fundación Galicia Obra Social, que desenvolverá a actividade.

Con todo, a autorización permitirá desenvolver a actividade de recollida de residuos dos fondos mariños e xuntalos no peirao para o seu posterior tratamento por un xestor autorizado.