Importante convocatoria da plataforma A Coruña Pola Paz nestes tempos de contratos armamentísticos e xenocidios. O 9 de maio, coincidindo co 80 aniversario do final da Segunda Guerra Mundial, a plataforma convoca unha concentración cidadá ás 20:00 h na praza de Pontevedra, sumándose ao chamado do European Peace Project, unha mobilización internacional descentralizada en defensa da paz en Europa.
Baixo o lema “Os pobos europeos pola paz”, a convocatoria apela á conciencia cidadá para reclamar o cesamento das guerras, o freo ao gasto militar e o compromiso firme coa resolución pacífica dos conflitos e coa inversión social.
O acto será tamén unha homenaxe ás vítimas da guerra, do odio e da indiferencia en todo o mundo. A apertura correrá a cargo da bailarina Concha Pita Conde, que ofrecerá a súa peza “Danza pola Paz”.
A Coruña Pola Paz chama a asistir vestidas e vestidos de branco ou levando bandeiras brancas como símbolo universal da paz. Convida tamén a traer unha flor para ofrecer colectivamente durante o acto.
O manifesto que se lerá, proposto polo European Peace Project, denuncia a deriva militarista da Unión Europea e reclama recuperar o espírito orixinal do proxecto europeo como espazo de cooperación e convivencia entre pobos. Afirmando a fraternidade entre a cidadanía europea, condena a escalada bélica e reivindica a participación social como única vía para construír unha Europa de paz.
Entidades integrantes de A Coruña Pola Paz
- Asociación Veciñal As Xunqueiras – Mesoiro – Vío
- Asociación Veciñal Lonzas, Avenida del Ferrocarril, San Cristóbal das Viñas
- Asociación Veciñal Feáns “O Freixo”
- Asociación Veciñal Monte Martelo
- Asociación Veciñal San Cristóbal das Viñas Os Anxos
- Asociación Veciñal San Cristovo das Viñas
- Asociación Veciñal e Cultural Oza Gaiteira Os Castros
- Brigantium Atlántica e Verde
- CUT Galiza
- Greenpeace
- Marcha Republicana de Galicia
- Modepen Coruña
- Mundo Sen Guerras E Sen Violencia A Coruña
- Podemos A Coruña
- Poten100mos
- Sindicato da Elevación Galicia
- Sindicato Labrego Galego
- Solidariedade Galega
- Unión Comarcal Comisións Obreiras A Coruña
- Vangarda Obreira
Máis novas
Os recoñecementos á Defensa dos DDHH da Rede Acampa pola Paz terán cores palestinas
