Historia coruñenta, que diría Xurxo Souto, o vivido esta pasada de domingo na Sala Mardi Grass. A mítica Sala de Monte Alto acollía, no marco do Festival Noites do Porto, a estrea da nova banda Océano Eskizo.
Unha banda coa que revive o punk coruñés dos anos 80, pero tamén dos 90 e dos primeiros 2000, porque no seu elenco atopamos estrellas de varias xeracións. O frontman non é outro que Jonhny Rotring (o álter ego do eterno xornalista Xosé Manuel Pereiro), líder da histórica banda oitentera Radio Océano. Ao seu carón, á batería Luis Jarri e á guitarra Pedro Granell, almas de Los Eskizos e Kozmin Muffin, banda herculina que arrasou nos 90. Ao baixo e aos coros, Beni González-Dans, e completando o quinteto, o guitarrista Ricardo Saavedra, membro de Meu, o grupo que revolucionou cos seu power-pop a cidade a comezos de século.
”Gracias aos nosos 84 fans, que estades todos aquí. Con aínda menos xente Jesuscristo fixo virguerías”, arrincaba Pereiro, antes de poñerse a rasgar a súa voz con temas míticos de Radio Océano que xa coreaba o entregado público.
View this post on Instagram
Pasados os primeiros temas, Pereiro pediu “introspección” para asumir os novos temas, feitos en galego, que propón esta nova banda. Entre eles, a homenaxe ao rapaz estadounidense Luigi Mangione, acusado de asasinar a un empresario dunha aseguradora médica, que foi cancelado polo Youtube por apoloxía do terrorismo. Non hai mellor argumento para unha banda de punk que unha cancelación así.
A sala fervía, consciente de estar vivindo unha xornada histórica, que se completou coa aparición de Nuno Pico. O cantante de Grande Amore, veciño agora da nosa cidade, subiu a cantar varios temas, entre eles o himno “Coma o vento”, nun dos momentos máis álxidos da noite. Con todo, a garra máis punk foi a protagonista e que máis gustou ao veterano público, que gozaba dun son e unha potencia espectacular das guitarras.
Así enfoca a recta final este festival que pon en valor as salas da cidade.
Máis novas
Océano Eskizo, unha banda de míticos herculinos, debutará nas Noites do Porto
O Jazz Filloa, unha das salas de jazz máis antigas de España, abriu o Noites do Porto
“I know it could be safer to stay at home”. Crónica amarga do concerto dos Lemonheads
O Bristol, as salas da cidade e La Casa Azul, protagonistas do Noites do Porto
Así foi o 2024:
8.400 persoas gozaron dos concertos especiais das Noites do Porto
As salas e os bares, as primeiras protagonistas do festival Noites do Porto
