Volveu latexar na Coruña o pulso contra a violencia de xénero. Despois dos actos municipais da mañá, a manifestación desta tardiña de martes 25 de novembro volveu demostrar que a loita contra as violencias machistas é unha das principais necesidades da sociedade actual.
Centos de familias, amparadas en pancartas cheos de lemas reivindicativos e bandeiras de sindicatos, acodiron á chamada da Marcha Mundial das Mulleres e as entidades adheridas á rede local, para encher o centro da cidade de arengas e cánticos.
A manifestación parría do Obelisco, percorrendo os Cantóns e achegándose ata Praza de Galicia, diante da sede do Tribunal Superior de Xustiza de Galicia, antes de chegar á Praza de Ourense, na delegación do goberno.
O lema deste ano baséase na loita contra a violencia institucional e o seu carácter estrutural que invade cada unha das aristas da nosa sociedade. “Precisamos reconstruír con perspectiva feminsta toda a engranaxe institucional da nosa sociedade para eliminar as discriminacións e as violencias que sufrimos as mulleres galegas”, sinalan no manifesto.
Poden ler aquí o manifesto da Marcha Mundial das Mulleres polo 25N contra a violencia institucional.
Dacordo cos datos da Delegación de Goberno, ata este 25 de novembro de 2025, 38 mulleres foron asasinadas a mans das súas parellas ou ex parellas e xa son 1.333 desde que se empezaron a solicitar datos (2003). Das 38 mulleres asasinadas neste ano, o 63,2%, é dicir, 24 vítimas eran de orixe española e 14 naceran noutro país. Tamén este ano, 3 menores foron asasinados en casos de violencia de xénero. Dous deles eran fillos/fillas do agresor.
Así e todos, os colectivos sociais contabilizan xa 84 feminicidios rexistrados neste 2025, dos que 3 terían sido en Galicia.
