Goberno, Concello da Coruña e Xunta reivindicaron os avances na execución das obras da futura estación intermodal da cidade herculina, cun prazo de conclusión que situaron a finais de 2026.

Foi nunha visita do secretario de Estado de Transportes e Mobilidade Sustentable, José Antonio Santano, xunto co delegado do Goberno en Galicia, Pedro Branco, e o presidente de Adif, Pedro Marco. Tamén participaron a alcaldesa herculina, Inés Rei, e o conselleiro de Presidencia, Xustiza e Deportes, Diego Calvo.

Na visita ás obras, que contan cun investimento de 87 millóns de euros, comprobouse a finalización da construción da nova marquesiña, estrutura de 9.884 metros cadrados que cubrirá a nova zona de vías e plataformas da terminal.

A nova estrutura, chamada a converterse en elemento característico da renovada estación, segundo remarcouse, está conformada por unha estrutura de aceiro de 200 metros de lonxitude e 48,5 metros de ancho, sustentada sobre alicerces de formigón de 11,6 metros de altura. O final da súa montaxe está previsto que leve a cabo nos próximos días.

A marquesiña albergará a nova zona de vías e plataformas da estación, construída nun novo espazo ampliado cara ao sur (en dirección Santiago) e composta de seis vías, dúas para trens de longa distancia e catro para media distancia, e tres plataformas.

COOPERACIÓN

Tanto o secretario de Estado como a alcaldesa fixaron para finais de 2026 a finalización da obra. Esta última destacou a colaboración de todas as administracións “para que este proxecto sexa a finais do ano que vén unha realidade, unha nova estación de ferrocarril e de autobuses que estarán conectadas e compartirán todo o espazo entre a avenida de Sardiñeira e a do Ferrocarril”.

Mentres, o secretario de Estado destacou a cooperación institucional e a execución de estacións intermodais nesta e outras cidades galegas tendo en conta a súa “integración na cidade”. “Non son espazos alleos”, subliñou.

Ademais, incidiu en que o Goberno central está a traballar en novos servizos “que van ir vindo a Galicia, ligados á proximidade”. “Parece que só investimos en alta velocidade, pero tamén estamos a traballar nun servizo de proximidade, en Galicia, sobre todo, falando da media distancia, un novo modelo que ao longo dos próximos meses anunciaremos”, indicou.

Á súa vez, o conselleiro de Presidencia subliñou que a parte que lle correspondía á Xunta “está a piques de terminar”. “É unha aposta pola cidade e pola intermodalidad e contribúe a facer cidade”.