En outubro o profesorado realizaba un peche en protesta polo mal estado de saúde do ensino público no CEIP Alborada. Este martes 27 de xaneiro, os sindicatos CIG-Ensino e o STEG repiten acción protesta en toda Galicia para demandar avances na negociación de cara a conseguir melloras das condicións laborais do profesorado, como a baixada de ratios, a dotación de maior persoal para atender a diversidade aumentando o profesorado de AL, PT e orientación, retribucións salariais dignas, redución de burocracia, recuperación do horario lectivo, redución da xornada lectiva para maiores de 55 anos, recuperación das licenzas non retribuídas…, entre outras.
Esta será unha nova mobilización tralas 5 xornadas de folga realizadas no primeiro trimestre. Nesta ocasión serán máis de 20 en toda Galicia os centros que acollerán a comunidade educativa e na cidade da Coruña. Durante o peche aproveitarase para preparar cartelaría e pancartas, así como para deseñar conxuntamente próximas accións de protesta, intercambio de pareceres… até que a Consellaría atenda as demandas do persoal docente.
“Martes en loito, martes en loita”
A outra acción reivindicativa bebe do que xa están a realizar algúns centros desde o primeiro trimestre, que é fixar un día á semana para evidenciar todas as carencias que existen en materia de deficiencias de persoal. Para iso, e xogando co lema deste conflito “profesorado en loita” e coa cor negra, CIG e STEG propoñen que sexan os martes os días nos que o profesorado acuda vestido de negro e empapele os centros con mensaxes nas que queden de manifesto as necesidades educativas do centro que lle serán transmitidas ao alumnado e ao profesorado. O martes día 10 está previsto que se chame a todo o persoal docente e non docente dos centros a concentrarse ou ben á hora do recreo, á entrada ou á tarde, para facer visíbeis as súas reivindicacións a través de fotos e vídeos.
Peches en Galicia
Estes son todos os lugares de peche en Galicia:
MARTES 27 DE FEBREIRO
- A Coruña: CEIP Concepción Arenal
- Vigo: IES Politécnico
- Pontevedra: IES Frei Martín Sarmiento
- Monforte: IES Francisco Daviña Rey
MÉRCORES 28 DE XANEIRO
- Ourense: IES Julio Prieto Nespereira
XOVES 29 DE XANEIRO
- Compostela: CEIP Monte dos Postes
- Ferrol: CEIP San Xoán de Filgueira (19 horas)
- Vilagarcía de Arousa: IES Armando Cotarelo Valledor
- Viveiro: CEIP de Covas (17:30 horas)
MARTES 3 DE FEBREIRO
- Cee: IES Agra de Raíces
- Lalín: IES Laxeiro
MÉRCORES 4 DE FEBREIRO
- Lugo: IES Nosa Señora dos Ollos Grandes.
- Cangas: IES de Rodeira
XOVES 5 DE FEBREIRO
- Rianxo: IES Félix Muriel (19 horas)
- Ponteareas: IES Val do Tea
Máis novas dos recortes no ensino
O profesorado conmemora unha marcha fúnebre polo ensino público na súa primeira xornada de folga
