O Concello da Coruña, en colaboración cos hostaleiros e a federación de veciños, porá en marcha a próxima semana unha campaña para promover os bos hábitos no lecer nocturno. “Non gritar, non beber, non mexar“, resumiu de forma directa a rexedora herculina, Inés Rey, en relación a esta iniciativa que busca compatibilizar o lecer nocturno coa tranquilidade dos veciños e veciñas da cidade. A alcaldesa incidiu na importancia de non facer ruído na rúa nin sacar bebidas fóra dos locais, sumando a iso a necesidade de que non se mexe nas vías públicas ou nos portais, ao citar algunhas cuestións.

Sobre o obxectivo desta acción, que comezará a vindeira semana con material informativo como carteis, adhesivos, posavasos ou vinilos, entre outros, busca “concienciar”. “Non podemos deixar de controlar e sancionar cando haxa incumprimentos”, sinalou, no entanto, a rexedora. Aínda así, remarcou que coa campaña preténdese concienciar para “convivir” e que se sintan “cómodos hostaleiros, clientes e veciños”. “É unha campaña a pé de rúa”, sentenciou tamén para expor que logo farán outra máis grande con cubos nas principais zonas de lecer.

A meta é que, ao chegar ao Entroido, a cidadanía estea xa debidamente concienciada sobre o que se pode facer e o que non no espazo público. Nesta mesma liña manifestouse Héctor Cañete, presidente da Asociación de Hostaleiros da Coruña, quen insistiu en que a campaña vai dirixida especificamente aos clientes con “conduta incívica”, unha postura compartida por Luisa Varela, presidenta da Federación de Veciños.