Pasan os anos e nada cambia arredor do cárcere vello. A antiga prisión provincial segue esfolándose, e na cidade perdemos un patrimonio histórico que podería ser aproveitado para unha infindade de oportunidades, mentres dúas administracións, ademais da mesma cor política, seguen enleadas en débedas e trámites xudiciais.
Nesta situación, é o BNG o que lembra que o Acordo Político que acompaña os orzamentos do Concello para 2026, figura o compromiso do Goberno Local de iniciar unha nova negociación coa administración central sobre o antigo cárcere. Así o lembrará este xoves no pleno Francisco Jorquera: “Que vai facer o Goberno Local para dar cumprimento ao acordo político entre os grupos municipais do PSdeG-PSOE e o BNG para a aprobación dos orzamentos municipais de 2026, no relativo ao antigo cárcere?”, preguntará.
A xuízo do BNG, a situación da vella prisión “non é de recibo”. A ausencia de medidas de conservación e mantemento por parte do titular do edificio, o Estado, fai que o cárcere se ache “nun estado de total abandono e ameaza de ruína”, describe Jorquera. “Estamos a falar dun ben catalogado, situado na contorna dun monumento declarado Patrimonio da Humanidade e dun Espazo Natural de Interese Local”, engade. “A cidade da Coruña”, remarca, “non pode permitir o seu estado de degradación”.
Ao BNG parécelle obvio que se o inmóbel é de titularidade estatal lle corresponda á administración central “o deber de asegurar o seu mantemento e conservación”.
É por iso que o Concello ten que garantir o cumprimento desas obrigas por parte do titular do edificio, sen desbotar “a adopción de medidas forzosas e a apertura do correspondente expediente sancionador”, tal e como apuntaba unha moción do BNG que foi aprobada por unanimidade en xuño de 2025.
Máis novas
Volven solicitar que o vello cárcere da Coruña se transforme nun Lugar de Memoria
“O fallo sobre o Cárcere Vello esixe o compromiso para a devolución gratuita”
