Preto de 200 persoas arrouparon os docentes dos cursos culturais do Programa de Lecer do Fórum e do Ágora esta mañá na cacerolada convocada en María Pita. Unha mobilización para asegurarse que os membros do goberno, e da corporación municipal, que acodían ao pleno, se enteiran das demandas tanto dos 60 docentes como dos máis de 6.000 usuarios deste histórico programa.
Mentres no pleno, e vixiados por varios docentes (que ademais fixeron uso do escano cidadán, por segunda vez en 4 meses, se ben tiveron que esperar ás 17:00h da tarde á reanudación dun pleno que foi suspendido pola alcaldesa tras unha subida de tensión entre o PP e o PSOE), debatíanse dúas preguntas formuladas por PP e BNG sobre o asunto, na praza docentes e usuarios berraban e facían soar os seus elementos domésticos para deixar claro a súa disconformidade coa situación: varios meses de débedas, e xa un mes de atrasos na posta en marcha dos cursos.
Tivo arrestos Gonzalo Castro, Concelleiro de Cultura, para, antes de entrar no pleno, colarse no medio da cacerolada para “trasladarvos todo o meu apoio”, asegurando que “estamos solucionando o problema”, e que “o programa comezará en días”. Unha promesa que non sentou de todo ben entre o profesorado, que saben que as cousas non están tan avanzadas, e que o único que aceptou a empresa concensionaria Serviplús, é a cesión da débeda, non á cesión da xestión dos programas.
Xa no pleno, despois das inquerencias de BNG e PP por solventar con urxencia a situación, o propio Castro asegurou que o Concello ten “solucionado o máis urxente: o pago das débedas”, garantindo o pago (pendente de que un 30% do profesorado envíe a súa situación concreta), usando fondos do IMCE despois de reter varias facturas da propia Serviplús.
”A seguinte urxencia é a de manter o servizo, e para iso estase falando con varias empresas para que asuman a cesión temporal da xestión”, sinalou, asegurando que xa houbo unha reunión cunha empresa, pero sen matizar ningún paso máis. En paralelo, como sinalamos onte, “o Concello está a elaborar nun novo pliego” para a concesión da xestión do programa de Lecer (enténdese que tamén o das Escolas Deportivas Municipais), “no que se vai escoitar aos representantes dos traballadores”, apuntou agradecendo a colaboración da CIG.
No escano cidadán
Foi Beatriz Álvarez, en rrepsentación de máis de 70 educadoras e máis de 6000 usuarios do programa de Lecer, o que expuxo, xa ás 17¡:00 da tarde, “a grave situación que vive o noso colectivo de profesionais que representamos ao Concello da Coruña cada día da nosa vida laboral”. Debuxou a situación de levar moitos meses traballando sen cobrar (aínda hai 15 autónomos que levan todo 2025 sen cobrar, con máis de 4.000€ de débeda), sen ningún apoio municipal.
“Hoxe poderíamos dicir que estamos en vías de solventarse, pero cremos que estas novidades son máis a resposta ás nosas reivindicacións, que non a vontade real do Concello”.
Con todo, apuntou que o máis importante é “a recuperación do Programa 2026, porque os traballadores estamos sen traballar e os usuarios sen gozar deste programa que ten 25 anos de historia. Nós movemos a cultura de base, e as salas municipais culturais están baleiras e choran por nós”, sinalou defendendo o valor dos educadores por riba das empresas concesionais.
Preguntoulle ao edil de Cultura por unha data concretaria para a continuidade do programa de Lecer, ademais de demandar un soldo xusto, e información sobre a cesión do contrato por parte de Serviplús. Tamén pediron a revisión do convenio, e que se valore o convenio de eventos, como coherencia da dependencia do IMCE. “Esiximos prazos concretos e solucións inmediatas”, sinalou Beatriz Álvarez nesta internveción no escano cidadán:
Gonzalo Castro repetiu que se ten tramitado a cesión da débeda dos profesionais, e tamén aos autónomos, un total de 73
unha vez solventada a parte máis importante, sobre a data de inicio do programa 2026, “non podo dar unha data concreta”, pero “é cuestión de días, non de meses”.
Asegurou ademais que están a valorar xuridicamente establecer un novo pliego onde se poidan fixar certas condicións laborais e retributivas
Máis novas
O Programa de Lecer e as débedas dos docentes, pendentes da vontade da empresa reincidente
Docentes e usuarios defenden o Programa de Lecer nunha reivindicativa ”aula aberta” en María Pita
O Concello rescata, a medias, aos traballadores do Programa de Lecer do Fórum e do Ágora
