A Xunta somete a información pública o estudo de impacto ambiental para a planta de biogás no lugar de Vista Alegre, na parroquia de Soandres, municipio da Laracha, que promove Bioenergía A Coruña, un proxecto que foi rexeitado de forma unánime pola corporación no pleno municipal celebrado a finais de marzo.

O propio goberno local do PP sinalou que o Concello “deixou clara a súa oposición” a unha iniciativa que “xerou unha fonda preocupación entre veciños”. Durante o pleno, o alcalde popular, José Manuel López Varela, deixou claro que defenderá aos veciños e a protección da contorna.

A planta busca a valorización de residuos orgánicos de procedencia agrogandeira e da industria alimentaria para a produción de biometano, con características que permitan inxectalo na rede de gas. Agora, poderán presentar alegacións durante o prazo dun mes. En detalle, prevese procesar un máximo de 63.500 toneladas ao ano dunha mestura de residuos orgánicos (sólidos e líquidos), dos cales 6.500 toneladas estarán clasificados como residuos Sandach de categoría 3.

O proxecto presentado recolle que as instalacións se situarán na contorna de Vista Alegre, onde “se rexistran un total de 27 edificacións”. Ademais, proxéctanse redes separadas para a recollida dos distintos fluxos de augas residuais que se xerarán na instalación, cun destino diferente en función da súa natureza.