Pedro, Carlos e José Manuel son os primeiros membros da familia de Down Coruña en protagonizar un proceso de emancipación real e completo. Estas tres persoas con síndrome de Down e discapacidade intelectual veñen de asinar un contrato de aluguer para vivir de maneira independente nun piso compartido. Un fito histórico para o Programa de Vivenda da entidade herculina. Un momento que marca un antes e un despois nos itinerarios de vida independente que DOWN Coruña promove para os seus usuarios.

As súas caras no acto de firma, enmarcado na Área de Vida Adulta de DOWN Coruña, deixan clara a súa alegría e amosan o resultado dun proceso de varios anos de preparación progresiva. A través de sesións de habilidades de vida e experiencias en vivenda, a entidade deseñou un itinerario para que cada persoa adquirise as competencias, a autonomía e a confianza necesarias para dar este paso con plena seguridade.

Os seus testemuños, os das súas familias e os dos profesionais que guiaron o camiño ofrecen unha historia humana excepcional: a de tres persoas que romperon os límites do que a sociedade espera delas.

Un proxecto de vida, non un programa

A partir deste mes de abril, Pedro, Carlos e José Manuel comezan unha nova etapa vital no seu piso compartido. DOWN Coruña acompañaraos nos apoios que poidan xurdir, en estreita coordinación coas súas familias, para que o proxecto sexa enriquecedor para todos.

A entidade é consciente do alcance simbólico e práctico do paso dado: “Eles camiñan hoxe para que moitos outros poidan correr mañá”, sinalan desde DOWN Coruña, convencida de que esta experiencia abrirá o camiño a futuros proxectos de emancipación.

DOWN Coruña agradece expresamente a Asesoría e Inmobiliaria Regueiro as facilidades prestadas na xestión do aluguer. En particular, destaca a implicación de Cristina, a profesional que acompañou o proceso, cuxa dedicación foi fundamental para facer realidade este proxecto.

Este fito abre, ademais, unha reflexión social urxente sobre o acceso á vivenda, a inclusión real e o dereito das persoas con discapacidade a decidir como e onde queren vivir, sinalan dende a entidade.