Como se da revolución dos claveles se tratase (era 25 de abril), a veciñanza da Agra do Orzán volveu saír, unha vez máis, á rúa, para esixir un Parque de verdade. Gran resposta á chamada Asociación Agra, con máis de 500 persoas (un sábado pola tarde onde boa parte da veciñanza marcha cara as aldeas), demostrando que a xente segue sensibilizada co tema. Unha acollida semellante á vivida en novembro de 2024, porque en todo este tempo poucas cousas cambiaron.
Si que conta a veciñanza cun ”anaquiño” de parque, pero a zona con máis densidade de poboación da cidade (á que se lle van sumar as 3.600 novas vivedas da megaurbanización de Visma) segue sen unha zona verde de calidade.
O que si que mudou foi a proposta urbanística para o prometido durante décadas Parque da Agra. o goberno municipal estivo a piques de levar a pleno unha proposta na que ademais dunha serie de zonas verdes, a zona sumaría 21 novos edificios. Unha moción que foi adiada ao non ter os apoios suficientes, xa que o BNG manifestou as súas críticas á proposta urbanística, pero que intentará volver levar ao pleno do mes de maio.
”Atentado” e “burla”
A propia Asociación veciñal califica de “atentado” o Plan de urbanización para a zona do Parque da Agra proposto polo goberno, denunciando o feito de encher de “máis formigón para o barrio máis densamente poboado e construído da cidade”, considerándoo como “unha burla, que non podemos nin estamos dispostos a aceptar”, xa que “o que precisa este barrio son espazos verdes e para o lecer, e por eles imos seguir na loita”.
A Asociación, tras enteirarse pola prensa do proxecto urbanístico, foi convocada polo Concello a unha reunión o pasado xoves. Unha cita na que coñeceron polo miúdo un Plan que pretende erguer 21 novas edificacións (incluídos os propostos por Cebirán na zona das Adoratrices), para un total de máis de 400 novas vivendas.
”Ratificamos a nosa posición contraria a este proxecto especulativo, que non ten en conta o drama urbanístico que xa vive este barrio
onde só hai cemento e nin unha soa zona verde, para máis de 20.000 habitantes. É insostible, irracional e un sinsentido”, denuncia Ricardo Seixo.
A entidade pon o foco en 7-8 edificios, 4 na zona principal onde vai o parque e outros tantos que pechan a mazá pola parte de abaixo do Campo da Burra. Pero para explicar a sensación de “burla” que sinten, explican o que o Concello intenta facer precisamente no pequeno anaco de parque aberto hai un meses. “Nese espazo que se inaugurou como parcela verde, que non como parque, a proposta inclúe a urbanización do 40% desa parcela con 2 edificios de 6 plantas. É unha burla, que abran un espazo despois de 40 anos, e que na proposta inclúan novos edificios”, sostén.
Emotivísimo o canto do Grandola Vila Morena:
View this post on Instagram
Marcha festiva
Con todo, a marcha foi máis festiva, e a reinvindicación encheuse de música, dirixida polo eterno Xurxo Souto, para demostrar que “a veciñanza está disposta a seguir na loita por conseguir o parque que entendemos que se corresponde coas necesidades do barrio”.
