As obras de mellora e replanificación do parque de Santa Margarida avanzan, segundo a rexedora, Inés Rey, a bo ritmo tras varios meses de traballos no recinto. O proxecto, cun investimento de máis de 740.000 euros, “mellorará un dos espazos verdes máis relevantes da cidade ao traer novo mobiliario, vexetación e áreas de paseo, cunha formulación ideada para aproveitar ao máximo todo o terreo”.

A alcaldesa, Inés Rey, supervisou, xunto á concelleira de Mobilidade e Infraestruturas, Noemí Díaz, o desenvolvemento dos traballos, que afectan a unha superficie de máis de 78.000 metros cadrados. As actuacións en execución inclúen a renovación e adaptación dos camiños e sendas e a ampliación e mellora dos equipamentos e mobiliarios, tanto deportivos como de lecer.

Ademais, no marco desta intervención, incorporouse un novo illote axardinado para realzar a avenida das Ciencias, integrando mellor o parque coa contorna urbana e potenciando a súa biodiversidade. Con esta reforma, o Concello busca revitalizar un pulmón fundamental da Coruña, garantindo espazos máis accesibles e modernos para a cidadanía.