Xa vai para 6 meses dende que un Padroado de mínimos acordara a convocatoria dun novo concurso público para a escolla da persoa que iría ocupar a praza de dirección substituta da Fundación Luís Seoane. E seguimos sen ter novidades sobre o novo procedemento de contratación para dirixir o centro de arte contemporáneo máis importante da cidade
Hoxe é o BNG o que pregunta pola súa situación, que considera “no peor momento da súa historia”. Así o sinala a concelleira do BNG Mercedes Queixas, que culpa “a xestión do Goberno de Inés Rey”, e que levará o asunto ao pleno deste xoves en forma dunha pregunta oral que reza así: “Por que o Goberno Local ten paralizada a Fundación Luís Seoane?”, preguntará.
“Sete anos de Inés Rey deixan a Fundación Luís Seoane cunha dirección provisional, despois de se ter anulado un concurso previo inzado de irregularidades e cunha ausencia total de proxecto museístico para divulgar o impresionante legado de Luís Seoane”, afirma Queixas, quen á vez denuncia que o Padroado leva sen ser convocado desde o ano pasado.
Isto significa que non se teñen aprobado as contas de 2025, nin tampouco a programación de actividades e o orzamento de 2026.
A concelleira nacionalista critica ademais que Inés Rey renunciou á presidencia da Fundación Luís Seoane, delegándoa no concelleiro de Cultura e Turismo, Gonzalo Castro, un feito do que o Padroado non ten constancia oficial.
“O legado de Luís Seoane e a vontade de Maruxa Seoane non están a ser respectados polo Goberno de Inés Rey. Por iso volvemos levar o asunto ao Pleno, a preguntarlle ao goberno Local por que ten abandonado un dos tesouros culturais da nosa cidade”, conclúe.
A cronoloxía
Máis novas
