Xa pasaron 5 meses dende que un Padroado de mínimos acordara a convocatoria dun novo concurso público para a escolla da persoa que iría ocupar a praza de dirección substituta da Fundación Luís Seoane. Se ben a entidade segue acollendo actividades como a divertida conversa entre Nuno e Rodrigo Cuevas, dende o Concello non aportan novidades algunhas sobre o novo procedemento de contratación.
E iso que a entidade prepara, con motivo da celebración do 30 aniversario da súa creación, unha nova e importante exposició,n ‘Seoane reencontrado’, que saca á luz un conxunto de 55 óleos da colección institucional, e que estará aberta ao público do 14 de maio de 2026 ata o 14 de maio de 2027.
Cronoloxía
En outubro do ano pasado o Xornal destapaba a polémica contratación da “directora substituta”, provocando un regueiro de reaccións, dende os grupos da oposición (como o PP ou Sumar Galicia), ata de entidades como ADACE, pasando por un crú manifesto asinado por máis de 150 persoas vinculadas á cultura da cidade, entre as que se atopaban xentes como Correa Corredoira.
En novembro un Padroado de mínimos, sen prezenza da alcaldesa nin do concelleiro de cultura, aprobaba a convocatoria dun novo concurso, asegurando que presentarían unhas novas bases para a nova contratación. En febreiro a alcaldesa Inés Rey delegaba as súas funcións no Padroado no Concelleiro de Cultura Gonzalo Castro, no último movemento municipal arredor da FLS.
Porque a pesar de que en febreiro o BNG pediu información sobre o procedemento e a nova convocatoria do Padroado, nada se sabe dende entón, como recoñece tamén o propio grupo do BNG.
Máis novas
O BNG esixe a convocatoria do Padroado da Fundación Luís Seoane para abrir o novo concurso
Un Padroado de mínimos aproba convocar un novo concurso para a dirección da Fundación Luís Seoane
Correa Corredoira: “Fago un chamamento á refundación da Luís Seoane”
ADACE cuestiona “a equidade do concurso e a confianza na gobernanza da Fundación Luís Seoane”
