Segue perfilándose a silueta de cemento que sobrevoará o Parque de Oza. Hai novidades sobre a nova urbanización do Castrillón de preto de 1.000 vivendas na zona alta do parque, que se distribuirán en 6 mazás, con arredor unha ducia de edificacións, entre elas tres torres de 17 alturas.

Esta semana, a Xunta de Compensación APE H9-01 Parque de Oza -como promotores encargados do seu desenvolvemento- recibía o preceptivo informe cunha serie de cautelas e consideracións que terán que ser incorporadas ao proxecto, ao que determina ademais someter a Avaliación Ambiental Estratéxica Ordinaria.

A edificabilidade, 136.704,50 metros cadrados, mantense como a prevista no PXOM, pero o informe recoñece que se trata dunha “localización comprometida ademais pola topografía e a exposición visual”. Por iso, solicitan aos impulsores desta iniciativa que se complete a análise da incidencia visual deste novo desenvolvemento, en especial respecto ás tres torres proxectadas, desde puntos de observación sensibles da contorna (cotas altas da cidade, miradoiros e roteiros panorámicos) e que se teñan en conta, ademais, as cores de acabado das novas edificacións co fin de lograr unha integración harmoniosa coa contorna.

Tamén apuntan á necesidade de revisar a edificabilidade asignada á mazá M6, a situada fronte ao complexo deportivo- cuestión que será acometida na seguinte fase de tramitación, unha vez reconfigurada a ordenación coas cuestións que deriven da adaptación aos informes e suxerencias deste trámite ambiental.

Así mesmo, require que o PERI xustifique nunha análise comparativa a nova ordenación, e que esta evite o exceso de fraccionamento dos espazos e as zonas verdes públicas, ampliando ademais o estudo de soleamento existente en distintas franxas horarias e estacións.

No capítulo da mobilidade e sobre a solución deseñada respecto á conexión dos dous tramos da avenida da Concordia, o informe propón avaliar a incidencia dos cambios propostos sobre a mobilidade xeral da zona, esixindo que se complete cun estudo de capacidade de absorción das rúas previstas e as xa executadas, así como se confirme a suficiencia de prazas de aparcamento. Tamén apunta a que haberán de garantirse itinerarios accesibles e seguros tanto en mobilidade peonil como para os ciclistas e o transporte público.

Dado que o estudo arqueolóxico non achou restos, a Xunta conclúe que non resulta preciso establecer cautelas protectoras.

O equipo multidisciplinar encargado do deseño traballará de inmediato en atender estas indicacións e encaixar as suxerencias en materia medioambiental para poder seguir coa súa tramitación. O seu obxectivo é “acadar unha ordenación consensuada coa veciñanza e todas as partes implicadas”.

Máis novas

A veciñanza do Castrillón coñece o proxecto da urbanización das 1.000 novas vivendas