O persoal do comercio de alimentación da provincia da Coruña respondeu con forza á chamada ás urnas laborais. A xornada de folga convocada para este venres está a transcorrer cun “seguimento masivo” por parte dos cadros de persoal. As traballadoras e traballadores esixen un convenio colectivo “digno” que poña fin á precariedade e permita avanzar en dereitos laborais e salariais básicos.
PARÁLISE NAS PLATAFORMAS E PIQUETES NAS TENDAS
A resposta da plantilla deixou as primeiras imaxes de impacto desde a madrugada. Segundo explicaron as centrais convocantes, o paro nas grandes plataformas de distribución loxística foi absoluto, ata o punto de que “non se entrou nin a traballar”. No tocante aos supermercados e grandes superficies, a actividade atópase moi minguada, operando unicamente con “algunha caixa” aberta en puntos específicos.
Ao longo de toda a mañá, diversos piquetes informativos percorren as principais áreas comerciais das vilas coruñesas, desprazándose de forma coordinada dun establecemento a outro. O obxectivo destas mobilizacións de rúa é visibilizar o conflito e sumar apoios a través das manifestacións convocadas nas cidades da Coruña, Ferrol e Santiago de Compostela, así como nas concentracións de protesta organizadas noutras localidades da provincia, como Ribeira.
Na Coruña, centos de traballadoras secundaron unha manifestación ata San Agustín, onde celebraron unha ruidosa concentración aos berros de “Hoxe non se compra”, “Corrupción, na alimentación” ou “O seu beneficio, o noso sacrificio”.
UNHA SUBIDA DO 10% VINCULADA AO IPC REAL
As organizacións sindicais CCOO, CIG, UXT e USO promoveron este paro de 24 horas despois de varios meses de negociacións infrutuosas. Os voceiros dos traballadores acusan á representación empresarial dun “inmobilismo” total e de carecer de interese real por mellorar o día a día das miles de persoas afectadas.
Denuncian, así mesmo, que a patronal se nega en redondo a asumir propostas fundamentais para recuperar o poder adquisitivo, mellorar a conciliación ou dignificar as condicións laborais dun sector que se demostrou esencial. Entre as principais demandas da folga destaca unha proposta de incremento salarial do 10% para este ano 2026, un 4,5% para o vindeiro 2027 e un 4% de cara ao exercicio de 2028.
Para o bloque sindical resulta unha condición irrenunciable que todas estas subas vaian acompañadas dunha cláusula de revisión conforme ao IPC real. Lembran que o sector arrastra unha fenda constante e que hoxe en día moitos dos soldos apenas superan o Salario Mínimo Interprofesional (SMI). A maiores das táboas salariais, as empregadas esixen unha redución da xornada, melloras no cobro das baixas por Incapacidade Temporal (IT) e o recoñecemento de pluses por antigüidade ou por traballar os domingos.
A PATRONAL APREZA NORMALIDADE E PIDE DIÁLOGO
A Asociación de Supermercados da Coruña (ASAC) expresou a súa disposición ao diálogo para acadar un acordo equilibrado tras a folga convocada este venres polas centrais sindicais en demanda dun convenio digno. En contraste co seguimento “masivo” que soutiñan os sindicatos convocantes, desde a asociación aseguran que “a inmensa maioría dos establecementos afectados permaneceron abertos e que a actividade comercial mantívose durante a mañá”.
Dende o colectivo empresarial apuntan que a xornada transcorreu con normalidade “agás incidencias puntuais derivadas do seguimento da convocatoria e da actuación de piquetes informativos”, segundo indican nun comunicado.
“En ASAC respectamos plenamente o dereito de folga dos traballadores e das traballadoras, así como o dereito dos que decidiron acudir aos seus postos de traballo”. “E mantemos a nosa vontade de diálogo e de acadar un acordo equilibrado e sostible para o conxunto do sector”, engaden. Neste sentido, confían en que a vindeira reunión da mesa negociadora “permita avanzar cara a posicións que fagan posible un acordo”.
