A Xunta de Galicia traballa na candidatura para que o Centro Integrado de FP Paseo das Pontes da Coruña sexa recoñecido como Centro Nacional de Referencia de FP. Así o debullaron na súa visita este pasado venres ao centro a directora xeral de Formación Profesional, Eugenia Pérez, a secretaria xeral de FP do Ministerio, Esther Monterrubio, xunto con representantes de INDITEX.
Deste xeito, o centro coruñés sería o primeiro en acadar este recoñecemento estatal na familia profesional de Téxtil, Confección e Pel, na que aínda non hai ningún Centro Nacional de Referencia. Galicia xa acadou esta distinción para dous centros na familia profesional Marítimo-Pesqueira, na que os únicos dous centros nacionais de referencia de toda España son o Instituto Galego de Formación en Acuicultura (IGAFA, A Illa de Arousa) e o Instituto Marítimo Pesqueiro do Atlántico (Vigo), ambos dependentes da Consellería do Mar.
A Rede de Centros de Referencia Nacional está conformada por 40 centros de toda España. Galicia conta con seis centros na Rede Estatal de Excelencia da Formación Profesional, polo que se sitúa no grupo de comunidades líderes neste eido. Contan con esta distinción os centros integrados de FP Universidade Laboral (Culleredo), Ánxel Casal-Montealto e Someso (os dous na Coruña), Politécnico de Santiago (Santiago de Compostela), As Mercedes (Lugo) e Carlos Oroza (Pontevedra).
Máis novas
O presidente da CEG apoia á patronal coruñesa e rexeita o “acoso” nas protestas do téxtil
