Novidades hoxe arredor do conflito sobre a negociación do convenio do sector do metal na provincia. Dende primeira hora, uns 800 traballadores do sector secundaron a súa oitava xornada de folga para esixir un convenio “digno” que inclúa melloras laborais e salariais, así como medidas contra a precarización.
Na cidade herculina e no marco de dúas xornadas de folga esta semana, o martes e este mércores, a manifestación partiu desde a praza de Tabacos para finalizar ante a sede da Xunta, no edificio administrativo de Monelos, coreando consignas en demanda dunha solución e tamén lanzando petardos, como noutras ocasións.
Ao longo da mañá os sindicatos convocantes da folga, que valoraron de forma positiva o seguimento dos paros, advertiron de que acudirán a un proceso de mediación para tentar desbloquear a negociación do convenio colectivo sen renunciar ás súas principais reivindicacións.
O representante de CIG-Industria en Ferrol, Serio Martínez, asegurou que a participación na folga mantén niveis similares aos de xornadas anteriores e destacou que “maioritariamente o sector está a responder moi ben”. Aínda que sinalou que existen algunhas empresas nas que parte do persoal continúa traballando, expresou a satisfacción do sindicato polo seguimento das mobilizacións.
MEDIACIÓN, NON ARBITRAXE
O dirixente sindical precisou que a mediación non implica unha arbitraxe e que o mediador se limitará a tentar achegar as posicións de ambas as partes para favorecer un acordo. Así mesmo, lembrou que os sindicatos non están obrigados a aceptar ningunha proposta e poden abandonar o procedemento en calquera momento.
“Imos con todo o ánimo de chegar a un acordo, igual que habemos ido a todas as reunións”, afirmou Martínez, quen subliñou que existen cuestións que a parte social considera “irrenunciables” e que seguirán defendendo tanto na mesa de negociación como durante a mediación.
Pola súa banda, o representante de CC.OO. Industria en Ferrol, Marcos Vázquez, recoñeceu o impacto económico que a folga está a ter sobre os traballadores, pero defendeu a necesidade de alcanzar un convenio que garanta salarios dignos durante o próximos tres ou catro anos.
Vázquez criticou o que cualificou de “inmobilismo” da patronal e sostivo que esta pretende ampararse agora na figura dun mediador para introducir concesións que, ao seu xuízo, debería expor directamente na negociación colectiva.
Tamén lembrou que a mediación non ten carácter vinculante e que, unha vez escoitadas as posicións de ambas as partes, calquera proposta deberá ser valorada por sindicatos e empresarios.
Desde FICA-UXT, Fernando Vázquez insistiu en que as organizacións sindicais manteñen varias “liñas vermellas” na negociación, entre elas aspectos relacionados cos salarios, a vixencia do convenio, a regulación da subcontratación e a situación dos traballadores fixos descontinuos.
O representante de UXT asegurou que os sindicatos acudirán á mediación “con boa vontade”, aínda que reprochou á patronal desaproveitar numerosas oportunidades para avanzar na negociación durante os últimos meses.
Segundo indicou, as conversacións poderían atoparse moito máis avanzadas e mesmo culminar coa firma do convenio se a representación empresarial mostrase unha maior disposición a alcanzar acordos.
Máis novas
A patronal do metal incide na necesidade de avanzar na negociación
A CIG mantén a folga no metal da Coruña ante a “tomadura de pelo” da patronal
