Axentes da Policía Nacional detiveron na Coruña un cidadán de nacionalidade albanesa como presunto autor dun delito de ameazas graves por supostamente intimidar cunha pistola dúas persoas. Os feitos ocorreron cando o detido, por causas que aínda están a ser investigadas, brandiu unha arma para ameazar as dúas vítimas, o que xerou unha situación de grande alarma. Tras recibir o aviso, axentes da Unidade de Delincuencia Especializada e Violenta (UDEV) iniciaron unha investigación que permitiu identificar o presunto autor dos feitos.
REXISTRO NO DOMICILIO DO INVESTIGADO
Unha vez localizado o domicilio do investigado, a Policía obtivo autorización xudicial para realizar unha entrada no inmoble. O operativo levouse a cabo coa colaboración do Grupo de Operacións Especiais de Seguridade da Xefatura Superior de Policía de Galicia. O home foi detido e trasladado a dependencias policiais. No posterior rexistro practicado no domicilio interveuse a arma supostamente utilizada, dous cargadores e munición, así como un dispositivo de inmobilización eléctrica que será obxecto de análises periciais.
A INVESTIGACIÓN CONTINÚA ABERTA
A investigación continúa aberta co fin de esclarecer por completo as circunstancias nas que se produciron os feitos. O detido, que conta con numerosos antecedentes, foi posto á disposición da autoridade xudicial como suposto responsable de dous delitos de ameazas graves, un delito de tenza ilícita de armas e un delito contra a administración de xustiza.
