Un tremor de magnitude 3,1 con epicentro no océano Atlántico, situado a preto de 200 quilómetros das costas da provincia da Coruña, tivo lugar esta tarde de luns. O 112 Galicia informa de que “segue con atención a información” sobre este terremoto, aínda que “ninguén utilizou este servizo para avisar de ningunha incidencia relacionada con este tremor”.
Segundo a información do Instituto Xeográfico Nacional, o terremoto tivo lugar ás 15,39 horas deste 27 de xullo. O epicentro sitúase a 36 quilómetros de profundidade, mar dentro no Atlántico. Os terremotos que se sitúan entre 2 e 3 graos de magnitude non son xeralmente perceptibles.
