O Bloque Nacionalista Galego (BNG) reclama ao Goberno central garantir o cumprimento da Lei de Memoria Democrática na Coruña e proceder, no ámbito das súas competencias, a retirar as denominacións, honras e símbolos franquistas.
Tal e como trasladou o Bloque en nota de prensa, o deputado da formación no Congreso, Néstor Rego, lembrou que a Lei de Memoria Democrática “non deixa lugar a interpretacións” ao establecer a obrigación das administracións públicas de retirar calquera elemento que implique a exaltación da sublevación militar, da ditadura franquista ou das persoas que participaron nela.
“Máis de cincuenta anos despois da morte do ditador resulta inaceptable que continúen existindo espazos públicos e distincións honoríficas dedicadas a colaboradores do franquismo”, remarcou. Segundo sinalou o BNG, na cidade herculina aínda permanecen denominacións e honras dedicadas a Pedro Barrié da Maza, Alfonso Molina Brandao e Fernando Álvarez de Sotomayor, a pesar da súa participación acreditada no “espolio” do Pazo de Meirás.
E é que, lembrou que o Tribunal Supremo declarou “de forma firme” que o Pazo pertence ao patrimonio público e que tanto a suposta doazón ao ditador como a posterior compravenda foron operacións carentes de validez xurídica, quedando acreditado o seu “carácter fraudulento”. “Ninguén que colaborase co espolio dos bens públicos do pobo galego e coa consolidación da ditadura pode seguir recibindo homenaxes institucionais nunha sociedade democrática”, afirmou.
Así mesmo, o deputado nacionalista indicou que a principal vía de acceso á cidade continúa levando o nome de Alfonso Molina e que unha das súas avenidas mantén a denominación de Pedro Barrié da Maza. Ademais, ambos conservan o título de Fillo Predilecto da Coruña e os seus retratos seguen presentes na Casa Consistorial de María Pita.
Néstor Rego tamén reclamou actuacións “inmediatas” sobre aqueles elementos que dependen directamente da Administración do Estado. Concretamente, solicita o cambio de denominación do dique de abrigo ‘Pedro Barrié da Maza’, dependente da Autoridade Portuaria da Coruña e, por tanto, do Ministerio de Transportes e Mobilidade Sustentable.
“O Goberno non pode limitarse a esixir o cumprimento da lei ás demais administracións mentres mantén infraestruturas da súa titularidade con denominacións incompatibles coa Memoria Democrática. Debe actuar con ejemplaridad e cumprir as obrigacións que lle impón a propia lei”, subliñou. Finalmente, o Bloque demandou ao Executivo central impulsar unha revisión do Catálogo estatal de símbolos e elementos contrarios á memoria democrática para incorporar todas aquelas referencias que aínda non figuran nel e que continúan presentes no espazo público.
