O xerente da Área Sanitaria da Coruña e Cee, Luis Verde, atribuíu a un “pico” no número de urxencias atendidas no Complexo Hospitalario Universitario da Coruña (Chuac) os “momentos de tensión” no servizo. Con todo, destacou a “normalidade” no funcionamento.

“Con carácter xeral, estamos dando resposta á demanda que temos“, asegurou a preguntas dos medios de comunicación sobre o funcionamento do Servizo de Urxencias este verán. Fíxoo despois de participar nunha reunión da Comisión de Seguimento do ‘Novo Chuac’. Neste sentido, referiuse a que “hai oito días” se produciu “un pico” no que o número de urxencias atendidas “superou os 600 pacientes”. “Cunha porcentaxe de ingresos que superaba o 7%”, detallou.

“Sempre facemos unha programación de verán para compaxinar o descanso dos profesionais coas necesidades asistenciais”, explicou, para engadir que “despois” se fan “axustes”. “Imos reaxustando en función da demanda”, especificou. Así, apuntou a unha “reordenación da hospitalización para activar esas camas que están previstas para non seren utilizadas” e incidiu en que o hospital se atopa “nunha situación de normalidade”.