O Concello da Coruña participará na campaña estatal de observación segura da eclipse total de sol do próximo 12 de agosto mediante a repartición gratuíta de lentes homologadas para observación solar nos Museos Científicos Coruñeses.
Segundo traslada o consistorio, as lentes entregaranse ás persoas maiores de 16 anos que accedan aos museos municipais ata esgotar existencias.
A iniciativa, engade, forma parte da campaña ‘Unha vista única. Cóidaa’, promovida polo Ministerio de Ciencia, Innovación e Universidades e o Grupo Social ONCE para fomentar a observación segura do denominado ‘Trío de Eclipses 2026-2028’ e previr os riscos oculares asociados á contemplación directa do Sol.
No marco desta actuación distribuiranse en toda España dous millóns de lentes certificadas, das que 300.000 serán canalizadas a través da Fundación Española para a Ciencia e a Tecnoloxía (Fecyt) entre museos, centros de investigación e entidades científicas, entre eles os Museos Científicos Coruñeses.
