Un total de 11 persoas resultaron feridas nun incendio rexistrado durante a madrugada deste domingo nun edificio da Coruña, situado na rúa Nicomedes Pastor Díaz. O lume orixinouse arredor das 02.00 horas nunha vivenda do primeiro piso e o fume estendeuse rapidamente ao resto do inmoble a través das escaleiras, o que obrigou a decretar o desaloxo preventivo do edificio mentres se desenvolvían os traballos de extinción e ventilación. Todas as persoas afectadas foron atendidas no lugar polo persoal sanitario e nove delas tiveron que ser trasladadas ao Complexo Hospitalario Universitario da Coruña (CHUAC). Segundo a información facilitada polo 112 Galicia, en principio ningún dos casos reviste gravidade.
O LUME PUIDO COMEZAR NUN PATINETE ELÉCTRICO
Os bombeiros desprazados ata o punto trasladaron á central de emerxencias que a orixe do incendio podería estar nun patinete eléctrico. As lapas afectaron principalmente a unha vivenda do primeiro andar, onde quedaron calcinadas dúas habitacións, mentres que outras zonas sufriron danos a consecuencia do fume. As primeiras chamadas ao 112 permitiron localizar o incidente e activar un operativo no que participaron efectivos do 061, os Bombeiros da Coruña e as policías Local e Nacional.
O FUME ESTENDEUSE POR TODO O EDIFICIO
No momento do incendio había persoas tanto na vivenda afectada como no resto do inmoble. Debido á rápida propagación do fume polas escaleiras, procedeuse ao desaloxo preventivo de todos os residentes mentres os bombeiros apagaban o lume, ventilaban o edificio e comprobaban as condicións de habitabilidade. Varias das persoas que se puxeron en contacto coa central de emerxencias advertiron de que había “moitas” persoas afectadas polo fume. O 112 confirmou finalmente un total de 11 feridos, dos que nove foron trasladados ao hospital.
OS VECIÑOS RETORNARON ÁS SÚAS CASAS ÁS SEIS DA MAÑÁ
Unha vez rematadas as tarefas de extinción, ventilación e revisión do inmoble, as persoas desaloxadas puideron volver ás súas vivendas arredor das 06.00 horas deste domingo.
