Deberían ser tempos de ilusión, coa volta do Dépor á 1ª División. Pero o club e a cidade parecen máis fracturados que nunca. A crise aberta dende as esixencias marcadas aos 4.000 abonados de Maraton Inferior parece seguir medrando, nun proceso no que a directiva parece querer meterse nun calexón sen saída.
Este pasado luns debutaba o Dépor en Riazor na máxima categoría do fútbol estatal 3.000 días despois do último desceso. 8 temporadas pasamos polo barro para poder ver de novo os logos da temida LaLiga. E o que debía ser unha festa convertiuse nunha primeira batalla á vista de todos. A antiga bancada de General (víronse moitas por outras partes do estadio) demostrou o seu rexeitamento a toda esta política de xentrificación e criminalización do club vestindo camisetas laranxas, moitas das compradas ás Peñas convocantes (a pesar dos intentos de facer fracasar a campaña a través da Policía), pero tamén do Basquet Coruña ou mesmo da Holanda de Gullit, como vestía o propio Pacho Dopico.
Durante o partido os Riazor Blues demostraron a súa protesta cos seus silencios e os seus pitidos, pero non faltaron á cita co seu equipo, conscientes de que os xogadores e o equipo seguen estando por riba dos seus mandatarios.
Censura aberta
Máis grave aínda tornouse a situación cando en zona mixta, aparecía Ximo a responder as preguntas dos xornalistas. Foi Xavi Torres, da CTVG, o único que se atreveu a preguntar sobre a situación vivida no eido extradeportivo ao que saltou inmediatamente un dos responsables de prensa do club cun rotundo ”Pregunta non procedente”, dando practicamente por pechada a rolda de prensa do lateral branquiazul e deixando coa boca aberta ao resto de xornalistas.
As queixas ao longo deste martes nas redes sociaisi foron continuas e hai moita expectación ante a rolda de prensa que teoricamente vai dar Antonio Hidalgo este mércores.
Criminalización
A cousa tornouse aínda máis complexa ao longo da tarde. Volveu o club afondar na criminalización da afección, e iso é algo que doe e moito entre todos os siareiros branquiauzuis, e que está a xerar mesmo desunión entre diferentes sectores da mesma. A estratexia comenzada polo equipo de Manu Sainz e Mássimo Benassi parece enfocada a deslixitimar a representación da afección que ata agora recaía sobre a Federación de Peñas unha vez que esta se postulou cos Riazor Blues e cos Old Faces, provocando ademais unha fractura no seo do deportivismo.
Ao longo deste luns houbo dous comunicados nesta liña. Primeiro, facíase público unha resposta oficial do club a un socio trala instalación dunha nova cámara de televisión en plena Tribuna Superior, ao carón do palco pero xusto diante de varios asentos vendidos a socios deportivistas. O club aseguraba que o profesional non puido estar gravando polas “increpancias” dos propios socios.
Pero é que ao longo da tarde, o Club publicaba un comunicado no que aseguraba que se ve obrigado a tomar medidas para protexer a varios xogadores tras unhas teóticas increpancias botadas por un par de energúmentos a Mella e Villares.
As Peñas respondían con outro comunicado no que consideran “ridícula a fuxida para adiante” do club, poñendo o foco en Benassi, pedindo liberdade de expresión e tendendo a man para unha solución para Maratón Inferior.
A centrificación
Polo camiño crúzanse outros aspectos que está separando o club dos verdadeiros afeccionados, como as 8 zonas hostaleiras de máxima calidade que ofrece o club e que tanto contrastan co abandono dos baños e de moitos asentos, por non falar do diferente trato co alcohol entre unhas zonas e outras.
Resulta dificilmente entendible que neste momento, que debería ser de calma e ilusión polo equipo conformado para competir na 1ª, A Coruña estea vivindo esta estrana situación.
Máis novas
A inxustiza, o relato, e a xentrificación poden levar por diante o mellor momento do Deportivo
