Desde o inicio do curso, a comunidade educativa do IES Ramón Menéndez Pidal-Zalaeta está a vivir unha situación de preocupación e incerteza relacionada co desenvolvemento das obras no centro, especialmente polos traballos previstos para a retirada de materiais con risco de amianto.
A ANPA vén realizando un seguimento da situación e solicitando á Administración información e documentación sobre as condicións de seguridade e salubridade do centro, así como sobre a planificación e execución das actuacións pendentes.
As familian lamentan a falta información sobre os procedementos, e o cambios nas previsións, unha vez que os traballos de retirada de
amianto ían realizarse durante as fins de semana do 18 ao 20 de setembro e do 25 ao 27 de setembro, pero finalmente non se levaron a cabo, afrontando unha serie de incongruencias nos plans da empresa executora (que sinalaba que o novo plan de traballo debía ser aprobado polo ISSGA antes de recomezar) e a Consellería de Educación (que aseguraba que os traballos ían comezar).
A día de hoxe, a ANPA continúa pendente de recibir ou coñecer información e documentación como o certificado de salubridade actualizado, os resultados da nova medición da calidade do aire; a información ou documentación relativa á revisión do estado das obras; o novo plan de traballo para a retirada do amianto e a correspondente autorización; as medidas de seguridade aplicadas nas zonas de obra, incluíndo andamios, grúa, valados, sinalización, accesos e protección fronte á caída de obxectos; nin, por suposto, un plan de evacuación de emerxencia temporal ou un calendario de traballo das tarefas pendentes.
Por iso, a Asemblea Xeral Ordinaria da ANPA celebrada o 24 de setembro, acordouse solicitar novamente á Consellería a documentación e información pendentes. Igualmente convocan unha nova concentración o luns 5 de outubro ás 9:00 horas diante do Edificio Administrativo de Monelos, na Praza Luis Seoane, para trasladar á Administración a preocupación das familias e reclamar información e respostas sobre a situación das obras.
