O alcalde de Sada, Benito Portela, de Sadamaioría, vinculou a moción de censura presentada polos edís do PP, PSOE e Alternativa dos Veciños con “intereses persoais e personalistas”.
Dos edís, entre eles os de Alternativa dos Veciños, formación que constituíu o tripartito de goberno con Sadamaioría e BNG, asegura que “actúan á marxe das organizacións e en contra dos seus criterios”, despois de que se desautorizou a moción por parte das direccións provinciais.
Tamén pide a PP, PSOE e Alternativa dos Veciños que expulsen “de inmediato” os seus concelleiros en Sada, “deixándoos en condición de tránsfugas“. “Sada non merece unha operación que non ten máis obxectivo que lograr, a medio ano das próximas eleccións, unha alcaldía e o goberno municipal á marxe das canles democráticas”, engade.
Por outra banda, asegura que “como xa ocorreu no pasado, a cidadanía de Sada porá a cada un no lugar que lle corresponde e máis pronto que tarde se saberán as verdadeiras razóns desta impresentable moción de censura”.
AS DIRECCIÓNS DO PP E PSDEG DESAUTORIZAN A MOCIÓN
As direccións do PP galego e do PSdeG manifestaron, a través de pronunciamentos de senllas cúpulas provinciais, que desautorizan a moción de censura presentada por PSOE, PP e Alternativa dos Veciños. Os socialistas, ademais, avanzan medidas disciplinarias se os seus edís seguen adiante.
O Bloque emitiu un comunicado no que esixe a PP, PSOE e Alternativa a desautorización da moción e que, “con carácter inmediato”, os partidos implicados declaren tránsfugas os seus representantes, como “único modo verificable de constatar a súa oposición” á iniciativa anunciada.
“Sorprendido” pola “deriva” de Alternativa, o BNG reivindícase como unha forza política “seria e rigorosa” e esgrime que, “pase o que pase”, as súas concelleiras Laura Rodríguez e Sara Arroxo seguirán desenvolvendo as súas funcións de goberno “sen desatender nin un minuto as necesidades” do Concello.
“Con total modestia e humildade, no Bloque apostamos pola constancia e o esforzo no traballo político e social como o mellor modo de servir aos veciños de Sada, fóra de conspiracións de salón, que en nada benefician ás demandas reais da sociedade sadense”, conclúe.
POSIBLE EXPULSIÓN
Pola súa banda, o PSOE provincial da Coruña anunciou que desautoriza a moción e anunciou medidas disciplinarias contra os edís que a asinen. “A dirección provincial socialista descoñecía esta moción de censura, unha iniciativa que nin apoia nin aproba”, traslada, nun comunicado. Así mesmo, ratifica que se tomarán medidas disciplinarias contra os edís que subscriban a moción e que, se seguen adiante, serán expulsados do partido.
NOVA XESTORA DO PP DE SADA
Tamén o PP provincial emitiu un comunicado no que recalca que non autorizou a moción que secundan os seus cinco edís da Corporación de Sada. “A seis meses da celebración das eleccións municipais, o PP considera que non é o momento de presentar a dita moción”, traslada.
Aínda entendendo que “existen motivos máis que suficientes para censurar o rexedor”, Benito Portela, “pola súa falta de xestión e a súa incapacidade para sacar adiante asuntos de vital importancia para o Concello, os populares cren que son os veciños e veciñas as que deben “censurar” o labor do goberno local en maio de 2023.
“O PP traballa xa no futuro de Sada. Proba diso é a nova xestora local aprobada este xoves, conformada por case medio centenar de persoas, disposta a aglutinar a todos aqueles veciños que queiran achegar ideas e propostas que permitan conformar un equipo unido e capaz de afrontar a cita coas urnas co obxectivo de ser a lista máis votada no municipio”, agrega o comunicado.
Máis aló, acerca de se os edís serán expulsados, fontes do PP provincial trasladaron que serán citados e escoitados a próxima semana, antes de tomar unha decisión.
ALTERNATIVA DOS VECIÑOS
A Comisión Permanente de Alternativa dos Veciños acordou abrir expediente disciplinario e suspender de militancia preventivamente aos dous edís de Sada que promoveron a moción. Nun comunicado, a formación subliña que os edís actuaron “unilateralmente, sen contar coa dirección do partido nin cos seus compañeiros de Sada, traizoando por completo os postulados políticos de Alternativa e a confianza depositada polos sadenses”.
“De ter un mínimo de dignidade e por hixiene democrática, os concelleiros que acaban de ser expulsados de Alternativa deberían entregar de inmediato a súa acta de concelleiras e non usurpar durante máis tempo un cargo que a cidadanía de Sada entregoulle a Alternativa e non a ninguén a título individual”, apunta.
