Os pais do coruñés Diego Bello asistirán a unha nova sesión da causa que se segue en Manila contra tres policías filipinos acusados de asasinar ao empresario coruñés e de falsificar probas para tratar de xustificar a súa morte, segundo informa a familia. Nun comunicado, lembra que “segundo a acusación da fiscalía filipina Diego foi abatido polo capitán Vicente Panos e os sarxentos Ronel Azarcón e Niño Boy Esmeralda ás portas da súa casa na illa de Siargao, ao sur do arquipélago en xaneiro do ano 2020“.
“Sendo a versión policial de que os policías terían disparado en defensa propia cando ían deterlle acusándoo de tráfico de drogas“. “As investigacións realizadas polo NBI (National Boreau of Investigation), un organismo dependente do estado filipino concluíron que os policías asasinaran a sangue frío a Diego e que colocaran nas súas mans unha pistola e unhas doses de cocaína, tentando explicar así a súa morte como defensa propia“.
A familia explica que o próximo día 22 terá lugar unha nova vista do xuízo na que estarán presentes os acusados, continuando o testemuño do experto en balística do NBI que iniciou a súa declaración na anterior cita o pasado mes de outubro. Os pais de Diego estarán acompañados polo avogado coruñés Guillermo Mosquera, que mantén contacto cos avogados filipinos que están a exercer en Manila a representación legal da familia de Diego Bello.
