O Colexio de Enfermaría da Coruña animou aos profesionais a denunciar as agresións, tanto físicas como verbais, que “son un problema crecente”. Nun comunicado, o Colexio detallou que este problema afecta “non só á seguridade” dos profesionais, senón tamén ao seu benestar emocional e psicolóxico, así como a “repercutir negativamente” na calidade da atención que lles prestan aos pacientes.
“A violencia nunca está xustificada, nunca é a solución, pero, normalmente, detrás dun ataque hai unha insatisfacción e frustración do agresor cos servizos sanitarios”, explicou o vicepresidente do Colexio de Enfermaría da Coruña, Benjamín Rodríguez. O persoal de enfermaría, detallou, especialmente en áreas como Urxencias, Atención Primaria e Coidados Intensivos, “enfróntase á presión e á tensión”. Tamén, continuou o comunicado, “é importante” que o Sergas analice as causas de insatisfacción da poboación e “poña en marcha medidas para mellorar a calidade asistencial”.
