É lamentable que dúas administracións entren en leas xudiciais provocando o abandono dun espazo tan singular e cunha potencialidade tan enorme como o espazo do antigo Cárcere Provincial da Coruña.
Polo menos, parece que o asunto avanza despois da sentencia anunciada esta semana que anula o convenio suscrito en 2005 polo entón alcalde, Francisco Vázquez, coa Sociedade de Infraestruturas e Equipamentos Penitenciarios (SIEPSE).
Falamos de terrenos cedidos gratuitamente en 1925 polo Concello e que o devandito convenio fixaba o pago de 1,12 millóns de euros ao Ministerio do Interior, do que depende Institucións Penitenciarias, ao tempo que cedía unha parcela anexa de 9000 metros cadrados para a construcción do Centro de Reinserción Social, unha vez que os reclusos foran trasladados, nos anos 90, ao novo cárcere de Teixeiro.
Deste xeito, o Concello da Coruña non terá que pagar pola recuperación do Cárcere Vello. O xulgado da Coruña deu a razón ao Concello desestimando a demanda presentada por Institucións Penitenciarias, e determinando que o terreo da prisión provincial é propiedade municipal, aínda que o edificio é do Estado.
A este respecto, Defensa do Común estima que o fallo xudicial require sen máis dilacións o compromiso político dos tres grupos municipais para esixir de xeito firme a reversión gratuita do inmóbel ao Concello, así como os conseguintes fondos estatais para súa rehabilitación definitiva, no horizonte de poder convertelo no gran centro coruñés de memoria democrática.
Finalmente, Defensa do Común reitera o feito, que considera fundamental, apelando á condición de que se trata dun inmóbel suxeito á catalogación dentro do PXOM, así como á idea de que o Estado incumpriu reiteradamente as súas obrigas legais respecto ao seu mantemento e rehabilitación fronte ao ocurrido noutro lugares da xeografía española.
A modo de exemplo, enumera os casos de Salamanca, onde hoxe está o Centro de Arte; Badaxoz, convertido no Museo Extremeño e Ibreroamericano de Arte Contemporáneo (Meiac); Xaén, que acolle o Museo Internacional de Arqueoloxía e Arte Ibérico; Palencia, centro cívico de carácter cultural; Valencia, sé de diversas consellerías da administración autonómica; mentres que o de Segovia alberga exposicións, concertos, filmoteca, creación artística e actividades culturais. Galiza, resalta, Defensa do Común, tamén reúne exemplos simbolizados nos casos de Vigo, onde hoxe se ergue o Museo de Arte Contemporáneo, ou o de Lugo onde conviven en perfecta armonía diversas actividades relacionadas coa cultura e o ocio.
Máis novas
O Estado pecha de novo e pon vixilancia 24 horas no Cárcere Vello
Nova campaña para recuperar e revertir ao patrimonio da Coruña o vello cárcere provincial
