Este xoves 30 de xaneiro, o Sporting Club Casino da Coruña acollía a presentación do tomo XXII da revista Nalgures. Este tesouro, un dos 140 medios en galego que temos no país, está editado pola Asociación Cultural de Estudos Históricos de Galicia e conta coa colaboración dos mellores historiadores da nosa xeografía.
Onte, o protagonista foi o investigador Carlos Pereira Martínez que ofreceu unha conferencia sobre o obxecto da súa investigación recollida en Nalgures, no que aborda “O espiritismo na cidade de Ferrol no século XIX: O centro La Reencarnación”. Tamén foron protagonistas as mulleres vinculadas ao movemento do espiritismo, moi militantes e protagonistas naqueles tempos. Emocionante o escrito que deixou unha delas debullando como quería que fose o seu enterramento, sen parafernalias católicas, pero con gran sentimento.
Numerosas temáticas
Ese precisamente é un dos temas que aborda este número da revista. Pero son moitas máis as temáticas que, de xeito profundo, recolle o número.
Arturo Abad Pardo publica “A guerra de sucesión en Galicia: contribucións económicas da cidade e provincia de Tui á causa de Felipe V na guerra de sucesión, 1700 – 1714”; Xurxo Alfeirán Chouciño achégase á vida do filántropo de Malpica, Anselmo Villar Amigo; Cristina Barreiro ofrece os resultados da súa investigación sobre “Unha posible atribución a un sartego en Sobrado dos Monxes. Gonzalo de Ozores e a súa localización mortuoria”.
Pola súa banda, José Enrique Benlloch Castiñeira escribe sobre os galegos presentes na resistencia francesa. “O preito aberto entre un alemán e o seu socio holandés polo comercio marítimo en Muxía e Camariñas, no 1586”, é o artigo achegado por José Enrique Benlloch del Río e José Enrique Benlloch Castiñeira a este Nalgures, que tamén recolle os “Novos achados na biografía do Bacharel Solla de Godoy: armorial, dote e testamentos” investigados por Alfonso Daniel Fernández Pousada.
Javier García Gómez profunda sobre a breve existencia na Alta Idade Media do Mosteiro de Pravio, en Cambre e José Manuel López Hermida e Alberto Paraje Méndez sobre as defensas costeiras de Ribadeo e a súa artillería nos séculos XVIII e XIX.
José María López-Dafonte analiza a figura de “Francisco Fernández García, paladín do socialismo ferrolán durante a restauración” e Carlos Pereira Martínez, o conferenciante deste acto de presentación da revista Nalgures, sobre “O espiritismo na cidade de Ferrol no século XIX: O centro La Reencarnación”.
Tamén aparece Gabriel Plata centrándose na figura de Gabriel Plata Astray, o propulsor do cultivo da alfalfa en Galicia no período 1961-1973. Completan a edición dous artigos máis. Un interesantísimo de Ana Romero Masía, sobre “Novos achados sobre as espontaneadas: Malpica de Bergantiños 1800-1850” e outro de Ramón Izquierdo sobre a Cruz Parroquial de San Munio de Veiga, en Ourense.
Desde a Asociación de estudos históricos de Galicia animan a investigadores e historiadores a enviar traballos para a súa publicación no seguinte número de Nalgures.
