O presidente da Deputación da Coruña, Valentín González Formoso, ofreceu colaboración institucional para a recuperación dos murais de Urbano Lugrís, situados na rúa Olmos, da cidade herculina, e que a Xunta adquiriu. Tras a reunión mantida recentemente polo Concello da Coruña e a Xunta, para concretar as actuacións a seguir, e ante a ausencia do organismo provincial no encontro, Formoso vinculouno a “problemas de axenda”.

Respecto diso, incidiu no apoio da Deputación da Coruña para manter o patrimonio “en todos os puntos cardinais da provincia” e no feito de que non recorran “a ningunha outra administración”. “Facémolo co noso orzamento”, recalcou para asegurar que non entende “o papel preponderante” da Deputación ante os chamamentos de Xunta e Concello para que estean presentes en próximas reunións.