Dous alumnos do máster en Deseño, Desenvolvemento e Comercialización de Videoxogos da Universidade da Coruña (UDC) gañaron o XXIV Premio Amizade que outorga o Rotary Club Ferrol.
Segundo traslada a institución académica, Gael Alberto Quintela (Vigo – 1999) e Álvaro Martos Soro (Mairena del Alcor, Sevilla – 1999), estudantes desta titulación que se imparte na Escola Politécnica de Enxeñaría de Ferrol (EPEF) gañaron este galardón co videoxogo ‘Camiño ao fogar’, ideado para ser aplicado nas sesións de terapia ocupacional.
En concreto, engade a UDC, o xogo nace como Proxecto de Aprendizaxe e Servizo (ApS), pensado para persoas usuarias da área de psiquiatría nun hospital de día ou ingresadas durante un período longo de tempo, “co obxectivo de facilitarlles a súa volta ao fogar mediante o reforzo de hábitos relacionados coas actividades do día a día”.
Ademais do correspondente diploma acreditativo, ambos os alumnos da UDC galardoados recibiron un cheque por un valor de 1.500 euros.
